पटना। धीरे-धीरे पैघ कंपनी सेहो बिहार मे छोट-छोट निवेश करबा लेल आगू आबि रहल अछि। खाद्य प्रसंस्करण स जुडल परियोजना मे सरकार कए काफी निवेश प्रस्ताव भेट रहल अछि, एहि स उत्साहित भ सरकार जतए कहलगांव मे एकटा फूड पार्क बनबा रहल अछि ओतहि हाजीपुर मे बिस्कुट हब तैयार भ रहल अछि। हाजीपुर मे एखन धरि तीनटा बिस्कुट कंपनी राज्य मे संयंत्र लगा रहल अछि। कंपनी क संयंत्र क जरिये राज्य मे करीब 118 करोड़ क निवेश आबि रहल अछि।
बिहार क उद्योग विभाग क प्रधान सचिव सीके मिश्रा कहला जे भागलपुर क निकट कहलगांव मे एकटा फूड पार्क सेहो बनाउल जा रहल अछि आ खाद्य संसाधन क्षेत्र मे कईटा कंपनी ओहि ठाम अपन इकाई लगेबा मे जुटि गेल अछि। कईटा क काज त अंतिम चरण मे अछि।
मिश्रा कहला जे हाजीपुर बिहार मे बिस्कुट निर्माणक प्रमुख केंद्र बनए जा रहल अछि।
एफएमसीजी कंपनी एहि ठाम कारखाना लगा रहल अछि। एहि सूची मे ब्रिटानिया आ पारले क नाम सेहो शामिल अछि।
मिश्रा कहला- खाद्य प्रसंस्करण हमर ताकत अछि आ हम अपन एहि काबिलियत क बेसी स बेसी इस्तेमाल करै चाहैत छी।
ब्रिटानिया समूह सबस पहिने हाजीपुर मे संयंत्र लगा रहल अछि। समूह एहि संयंत्र मे 55 करोड़ निवेश करि रहल अछि। कंपनी हाजीपुर क एहि संयंत्र मे अपन मशहूर ब्रांड्स गुडडे, टाइगर आ फ्रूटकेक क निर्माण करत। पारले समूह सेहो मुजफ्फरपुर मे 35 करोड़ टका निवेश करि कए संयंत्र लगा रहल अछि।
मिश्रा कहला जे एहि कंपनी कए संयत्र लगेबा लेल जमीन मुहैया करा देल गेल छल, आब आधारभूत संरचना तैयार भ रहल अछि। एकर अलावा खाद्य प्रसंस्करण क्षेत्र क लेल सरकार जे अनुदान देत अछि सेहो एहि कंपनी कए देल जा चुकल अछि। पश्चिम बंगाल क बंसल बिस्किट्स प्राइवेट लिमिटेड सेहो हाजीपुर मे संयंत्र लगेबा लेल 28 करोड़ निवेश करि रहल अछि।
कारोबारी सूत्र क अनुसार राज्य मे बिस्कुट क नीक बाजार उपलब्ध अछि, जेकरा भजेबा लेल कंपनी आगू आबि रहल अछि। जानकारक कहब अछि जे फिलहाल उत्तराखंड, उत्तर प्रदेश, मध्य प्रदेश आ पश्चिम बंगाल स बिस्कुट बिहार अबैत अछि, मुदा ओ दिन दूर नहि जखन बिहार स एकर निर्यात होएत। ओना एहि संबंध मे कोनो कंपनीक प्रतिनिधि स गप नहि भ सकल अछि।
