दोसरसमाचार
पटना। बिहार मे बिजली उत्पादन लेल पिछला किछु साल मे निजी क्षेत्र काफी निवेश करबाक इच्छा प्रकट केलक, मुदा अधिकतर निजी थर्मल पावर प्रोजेक्ट एकरारानामा तक सीमित भ रहि गेल। एकरारनामा क दौरान कहल गेल छल जे एहि स निवेश कए बढ़ावा भेटत, लोक कए रोजगार भेटत आ बिहार कए बिजली भेटत। मुदा एखन धरि एहन किछु नहि भेल। परियोजना मे देरी क मुख्य कारण बताउल जा रहल अछि कोल लिंकेज क अभाव। निवेशकक कहब अछि जे जमीन खरीद कए की करब, जखन धरि कोल लिंक नहि भेटैत अछि जमीन लेला स कोनो फायदा नहि। ओना निवेशक मानैत छथि जे जमीन अधिग्रहण एकटा पैघ समस्या अछि आ दिन प्रति दिन जमीनक मुआवजा बढत। तखनो बिना कोल लिंक कए जमीन मे निवेश करब ओ घाटाक सौदा मानैत छथि। हुनक कहब अछि जे कोल लिंक भेटलाक बाद जमीन अधिग्रहण क प्रक्रिया शुरू कैल जा सकैत अछि। ज्ञात हुए जे नागपुर क मेसर्स जास इन्फ्रास्ट्रक्चर कैपिटल प्राइवेट लि. द्वारा बांका मे 2640 मेगावाट, कोलकाता स्थित मेसर्स नालन्दा पावर कम्पनी प्रा. लि. द्वारा पीरपैंती मे 2000 मेगावाट, कोलकाता क मेसर्स गंगा पावर एण्ड नेचुरल रिसोर्सेज लि. द्वारा पीरपैंती मे 1320 मेगावाट, संग्रामपुर क कम्पनी मेसर्स इण्डिया पावर कारपोरेशन लि. द्वारा पूर्वी चम्पारण मे 1320 मेगावाट, गुडगांव स्थित एईएस इंडिया प्रा. लि. द्वारा भागलपुर क जगदीशपुर मे 1320 मेगावाट आ गुडगांव क कम्पनी मिराच पावर प्रा. लि. द्वारा लखीसराय मे 1320 मेगावाट क्षमता क विद्युत परियोजना क स्थापना लेल एकरारनामा पर हस्ताक्षर कैल गेल अछि। एकर अलावा बिहार पावर इन्फ्रास्ट्रक्चर कम्पनी प्रा. लि. द्वारा विद्युत स्थल क चयन क प्रतिस्पर्धात्मक निविदा द्वारा न्यूनतम दर पर विद्युत उत्पादक एजेंसी क चयन करबाक अछि। एकर आधार पर पीरपैंती मे 1320 मेगावाट आ बक्सर क चौसा मे 1320 मेगावाट क थर्मल पावर प्रोजेक्ट लेल निविदा आमंत्रित कैल गेल, मुदा तकनीकी कारण स आगू नहि बढि सकल। एहि ठाम कोल लिंकेज नहि भेला स परियोजना क प्रति मात्र एकटा निवेशक रुचि देखैलथि। निवेशक क साफ कहब अछि जे केंद्र क रवैया नाउम्मीद करैत अछि। ओना ऊर्जा विभाग एखनो उम्मीद नहि छोडलक अछि। प्रोजेक्ट स्थापित करबा लेल एमओयू करि चुकल कम्पनी 12म पंचवर्षीय योजना अवधि अप्रैल 2012 स मार्च 2017 तक काज शुरू करबाक उम्मीद करि रहल अछि। मुदा सवाल अछि बिना कोल लिंक कए इ परियोजना आगू कोना बढत। गौतलब अछि जे एहि निजी परियोजना स 85 प्रतिशत बिजली बिहार कए भेटबाक अछि, जखन कि एनटीपीसी क थर्मल स बिहार कए अधिकतम 50 प्रतिशत बिजली भेटैत अछि।
