पटना । बिहारक सभ जिलामे छोट उद्योग खोलल जयबाक क्रम शुरू भ’ गेल अछि। एकरा जिला औद्योगिक नव प्रवर्तन योजनाक अंतर्गत खोलल जा रहल अछि। एकरा लेल सरकार सभ जिलाके 50-50 लाख टाका देने छल।
सभ 38 जिलामे एखन धरि 189 छोट उद्योग चिन्हित भ’ चुकल अछि. बेगूसराय आ कैमूरमे त’ चारि ठाम काज शुरू होयबाक दावा सेहो उद्योग विभाग कयलक अछि। एहि सभ छोट उद्योगमे प्रवासी श्रमिकक समूह बना क’ हुनका रोजगार देल जा रहल अछि। सभ समूह पर 10 लाख टाका खर्च कयल जयबाक अछि। कोरोना कालमे बिहार लौटयवला लाखो प्रवासी श्रमिकक लेल राज्य सरकार कतेको नव योजना शुरू कयने छल। नव निवेशके आकर्षित करबाक लेल औद्योगिक निवेश प्रोत्साहन नीतिमे सेहो कतेको प्रमुख बदलाव कयल गेल अछि.
दोसरसमाचार
सरकार एहि क्रममे जिला औद्योगिक नव प्रवर्तन योजना शुरू कयने छल। एकरा अंतर्गत सभ जिला पदाधिकारीके सूक्ष्म इकाइ स्थापित करेबाक लेल 50 लाखक नव प्रवर्तन निधि देल गेल अछि. एहि धनराशि स’ सभ जिलामे स्थानीय विशेषता आ श्रमिकक जरुरति आ कुशलताके ध्यानमे रखैत 189 सूक्ष्म माने छोट उद्योग खोलल गेल अछि।
जिला स्तर पर प्रवासी श्रमिक वा कुशल कारीगरक समूह बनाओल गेल अछि। जे एकहि सेक्टर स’ जुड़ल होअय. कतेको ठाम एहि प्रक्रियाके अंतिम रूप देल जा रहल अछि। एहि समूहक पंजीकरण कराओल जा रहल अछि. सभ समूहमे कम स’ कम 10 गोटे होयताह. सभ समूह पर 10 लाख खर्च कयल जयबाक अछि त’ एहि लेहाज स’ सभ जिलामे पांच समूह बनाओल गेल अछि. माने पांच-पांच उद्योग सभ जिलामे स्थापित भ’ रहल अछि। ओतहि प. चंपारणमे एहन उद्योगक संख्या छह अछि।
राज्य सरकार एहि योजनाक अंतर्गत स्थापित इकाइक फारवर्ड आ बैकवर्ड लिंकेजके सेहो सुनिश्चित करबाक निर्देश देलक अछि। जाहि स’ इ इकाइ बहुत काल धरि कार्यरत रहि सकय. माने एहि इकाइके ने त’ कच्चा मालक कोनो दिक्कत होअय आ ने एकरा द्वारा तैयार मालके बाजारक।
एहि समूहक लेल सिलाई केंद्र, पेपर ब्लॉक उपकरण, हस्तकरघा बुनाई केंद्र, बढ़ईिगरी केंद्र, मशरूम प्रसंस्करण केंद्र, शहद निर्माण, बेकरी, स्टील फर्नीचर, खेलाक सामान, जैकेट आ बैग निर्माण, बांस उत्पाद पर आधारित उद्योग, लाउंड्री, लकड़ीक फर्नीचर, रेडीमेड गारमेंट, पेवर ब्लॉक, जरीक काज, इम्ब्राइडरी, अचार निर्माण, हैंडीक्रॉफ्ट, बनाना फाइबर, फुटवियर, पीवीसी बोर्ड, अगरबत्ती निर्माण आदि उद्योग खोलल जा रहल अछि. एहि सभक शुरू होइते हजारो लोकके रोजगार भेटत.
