दोसरसमाचार
पटना। बिहार आब देशक प्रमुख तरकारी उत्पादक राज्य बनि चुकल अछि आ ओ दिन दूर नहि जखन देशक थारी मे एकटा नहि एकटा तरकारी बिहारक होएत। धीरे-धीरे मुदा ठोस रूप स अग्रणी राज्य बनि रहल बिहार आब जैविक तरकारी दिस अपन ध्यान केंद्रित कए रहल अछि। ताजा आंकडा क अनुसार देश मे भिण्डी (रामझुमनी) आ फूलगोभी उत्पादन मे बिहार क स्थान द्वितीय अछि। एकर उत्पादन क्रमश: 7,88261 टन आ 11,18734 टन भ रहल अछि। आलू, बैगन आ पत्तागोभी उत्पादन मे बिहार तेसर स्थान पर अछि। उत्पादन 57,84,299 टन, 12,15641 टन आ 7,88261 टन भ चुकल अछि। टमाटर आ प्याज उत्पादन मे बिहार क स्थान देश मे आब चारिम भ गेल अछि। एहन मे सरकार आब बिहार मे जैविक तरकारी क उत्पादन कए बढेबा लेल योजना तैयार केलक अछि। एहि योजना क अंतर्गत पटना,नालन्दा आ वैशाली क 5500 हे. मे जैविक तरकारी करबाक निर्णय लेल गेल अछि। योजनाक संदर्भ मे कृषि मंत्री नरेन्द्र सिंह कहला जे रासायनिक खाद आ कीटनाशक दवाई क प्रयोग स उत्पादित तरकारी स निजात दियेबा लेल कृषि विभाग जैविक तरकारी क उत्पादन आ विपणन क योजना बनेलक अछि। केन्द्र क वेजिटेबुल इनिसियेटिव कार्यक्रम क जैविक तरकारी क खेती मे प्रयोग कैल गेल अछि। एहि पर वर्तमान मौसम मे 36.89 करोड़ व्यय होएत। सिंह कहला जे सोहडीह क जैविक उत्पाद कए सी-1 प्रमाण पत्र भेटल अछि जे बिहारक जैविक खेती लेल खाद क काज करत। ओ कहला जे अन्य जिला मे एकर संभावना कए तकबा लेल सरकार किसान आ बाजार क सर्वे कराउत। सिंह कहलाह जे अगिला साल स एसएफएसी क माध्यम स तरकारीक निर्यात त हेबे करत संग संग दूध क भांति कियोस्क पर सेहो भेटत। ओ कहला जे पटना मे 200 एसी ठेला स सेहो जैविक तरकारी बेचबाक व्यवस्था कैल जा रहल अछि। जैविक सब्जी क बुकिंग अग्रिम भुगतान पर सेलफोन स सेहो होएत। ग्राहक कए घर बैसल तरकारी भेटत। कृषि मंत्री नरेन्द्र सिंह कृषि उत्पादन आयुक्त अशोक कुमार सिन्हा, कृषि सचिव एन. विजयलक्ष्मी आ निदेशक अमरिन्दर सिंह क उपस्थिति मे उक्त घोषणा केलथि। कृषि मंत्री कहला जे नालन्दा जिला क सोहडीह क किसान अपन समूह बना लेलक अछि ,जे अनुकरणीय अछि। एहि गामक किसान गहीर नलकूप स्थापित कैलथि आ ओकर रखरखाव करबाक दिशा मे कार्य प्रारम्भ करि देलथि अछि। कृषि मंत्री क अनुसार तरकारी क उत्पादन मे रासायनिक उर्वरक आ कीटनाशक दवाई क अधिकाधिक प्रयोग कैल जाइत अछि। एकर सीधा असर शरीर पर पडैत अछि। एक प्रकार स तरकारीक रूप मे हमसब जहर खा रहल छी। एहि स मुक्ति लेल जैविक खेती कए प्रोत्साहित कैल जा रहल अछि। किसान स्वयं जैविक खाद क उत्पादन सेहो करि रहल छथि। कृषि मंत्री क अनुसार समृद्धि फाउण्डेशन आ अन्य संस्था द्वारा जैविक उत्पाद क विपणन होएत। केन्द्र क संस्था लघु कृषक कृषि व्यापार संघ (एसएफएसी) द्वारा जैविक सब्जी लेल चयनित पटना, नालन्दा आ वैशाली मे किसानक समूह बनेबा लेल आ तकनीकी सहयोग देबा लेल काज कैल जा रहल अछि।
