दरभंगा। सरकार त पहिनो घोषणा करैत रहल अछि, मुदा आब किछु घोषणा जमीन पर सेहो देखबा मे आबि रहल अछि। शायद बदलैत बिहार इ सबस पैघ सबूत अछि। दरभंगाक नवका वरीय पुलिस अधीक्षक विकास वैभव अपन योगदान क महज एक दिन बाद शहर मे रात्रिकालीन निःशुल्क बस सेवा चलेबाक क घोषणा केलथि त लागल जे हाल फिलहाल मे इ सेवा शुरू होएत, मुदा घोषणाक अगिले दिन ओकरा बाट पर उतारि एक प्रकार स सब कए चौंका देलथि। हुनकर इ सनेस नगरवासी लेल अमूल्य अछि। इ बस सेवा रातिक 11 बजे स भोरक पांच बचे तक लोक कए उपलब्ध रहत। शुरूआत मे इ बस सेवा शहरक मुख्य मार्ग पर चलाउल जा रहल अछि, जाहि मे बस अडडा आ रेवले टिसन अबैत अछि। एहन मे राति कए शहर पहुंचला पर घर जेबा लेल आब लोक कए कोनो असुविधा नहि भ रहल अछि। शहर मे ओना अपराधक कोनो विशेष रिकार्ड नहि अछि, तइयो एहि निःशुल्क बस मे सुरक्षाबलक तैनाती बाहर से आयल पाहुन कए सकून द रहल अछि। पूरा शहर एहि योजनाक स्वागत केलक अछि।
एहि योजना क बाद आब प्रमंडलीय मुख्यालय आ नगर निगम क्षेत्र हेबाक बावजूद दरभंगा शहर मे एखन धरि नगर बस सेवा नहि चलबा स मायूस लोक कए नव उम्मीद जगल अछि। शहर क भूगोल आ गणित मे लगातार भ रहल विस्तार कए देखैत कई बेर पहिनो एकर मांग उठि चुकल अछि, मुदा एखनधरि एहि दिस कोनो पहल नहि भ सकल अछि।
जानकार क कहब अछि जे सन 1972 मे जखन दरभंगा शहर कए प्रमंडल क दर्जा देल गेल छल तखने नगर बस सेवा शुरू कैल गेल छल, मुदा छह सालक बाद इ सेवा बंद करि देल गेल। ओहि समय बिहारक मुखिया क एहि निर्णय कए शहरक लोक विरोध नहि केलथि, जेकर परिणाम इ भेल जे ओ सेवा आइधरि बहाल नहि भ सकल। ओना 2002 मे तत्कालीन प्रमंडलीय आयुक्त अमिता पाल आ जिलाधिकारी आरबीपी यादव शहरी क्षेत्र क फैलाव कए देखैत नगर बस सेवा शुरू करबाक पहल केने छलथि, मुदा कतिपय कारण स एकरा बाट पर नहि आनल जा सकल। फेर इ प्रस्ताव ठंडा बस्ता मे चल गेल। कहबा लेल दरभंगा शहर क गिनती राज्यक पैघ शहर मे कैल जा रहल अछि, मुदा नगर बस सेवा क दृष्टि स शायद इ एक मात्र एहन शहर अछि जतए इ व्यवस्था नहि अछि। लगभग 12 किलोमीटर लंबा आ पांच किलोमीटर चौड़ा एहि शहर क एक छोड़ स दोसर छोड़ तक जेबा लेल कोनो व्यवस्था नहि अछि। नगर बस सेवा नहि रहबा स छोट वाहन चालक क मनमानी कए ल लोक परेशान छथि।
