पटना। महानगर बनबा लेल अग्रसर बिहारक राजधानी पटना मे सार्वजनिक यातायात कए आधुनिक आ सुलभ रूप देबाक योजना जमीन पर उतरबा लेल तैयार भ गेल अछि। देश मे मुंबई कए बाद पटना दोसर शहर बनत जाहि ठाम मोनो रेल दौड़त। योजना पर ठीक स काज हुए त 2015 धरि मोनो रेल बनि कए तैयार भ जाएत। बिहार सरकार एकरा लेल अपन सहमति द देने छल, रेलवे सेहो एकरा लेल अपन सहमति प्रदान करि देने अछि। पिछला दू साल स एहि दिसा मे भ रहल प्रयास आब जमीन पर उतरबा लेल लगभग तैयार अछि। एकरा लेल मार्च 2009 मे रेलवे क इकाई राइट्स टेक्नो इकोनोमिक फिजिबिलिटी स्टडी कए काज सौपल गेल छल। राज्य सरकार क संग विमर्श क बाद राइट्स मोनो रेल कोरिडोर लेल फाइनल प्रस्ताव तैयार करि देलक अछि। एहि लेल चारिटा एलायनमेंट तैयार कैल गेल अछि। दू फेज मे काज पूरा करबाक प्रस्ताव अछि। चारिम एलायनमेंट फेज-2 क हिस्सा अछि। राज्य सरकार क सहमति भेटलाक बाद एहि पर काम आगू बढत। राज्य सरकार स एहि संबंध मे शीघ्र फेसला लेबा लेल पूर्व मध्य रेलवे पिछला मास एकटा पत्र लिखलक अछि, जाहि मे मोनो रेल क फाइनल प्रस्ताव क उल्लेख अछि। रेल मंत्रालय पटना मोनो रेल लेल संभाव्यता रिपोर्ट क अध्ययन करि रहल अछि।
एहि संबंध मे इ’समाद पहिनो बता चुकल अछि जे जून 2010 मे मुख्य सचिव क समक्ष प्रेजेंटेशन भ चुकल अछि। दरअसल पटना मे मोनो रेल परियोजनाक परिकल्पना शहर मे यातायात क बढैत दबाव आ कम चौडा सडक कए देखैत कैल गेल अछि। एहि संबंध मे अधिकारीक कहब अछि जे पटना क सड़क कए आओर बेसी चौड़ा करब संभव नहि अछि, जाहि स यातायातक गंभीर समस्या उत्पन्न भ सकैत अछि। एहन मे मोनो रेल कए पटना मे अनला स काफी हद त समस्या क निदान भ सकैत अछि। पटनाक किछु मुख्य सडक क रोड डिवाइडर पर पिलर बनाकए ओकर उपर मोनो रेल चलाएल जाएत। रेल मंत्रालय एकरा लेल पटना जंक्शन स पटना क मुख्य इलाक कए जोड़िनहार चारि टा सडक पर ट्रैक क निर्माण करबाक योजना कए अंतिम रूप द देलक अछि।
मोनो रेल फिलहाल अमेरिका, जर्मनी, जापान, मलेशिया सन देश मे काफी लोकप्रिय अछि। इ रेल कम लागत, प्रदूषण मु्क्त, हल्का आ तीव्र गति स चलैत अछि। एहि मामला मे पथ निर्माण मंत्री प्रेम कुमार कहला जे पटना क आबादी कए देखैत सरकार मोनो रेल परियोजना पर काम करब शुरु करि देलक अछि।
