पटना। आर ब्लॉक स दीघा घाट तक बिछल रेल ट्रैक पर रोड बनेबाक योजना कए मंजूरी भेटलाक बाद बिहार सरकार पटना साहिब स पटना हाट क बीच सेहो रेल पटरीक जगह पर फोर लेन बनेबाक योजना तैयार केलक अछि। एहि इलाका मे जाम क समस्या कए देखैत राज्य सरकार रेलवे स इ लाइन मंगवा लेल कार्रवाई शुरू करि देलक अछि।
पथ निर्माण मंत्री नंद किशोर यादव कहला अछि जे ओना त एहि ट्रैक क आसपास कम आबादी अछि। बावजूद अगर रेलवे पटना साहिब स पटना हाट क बीच बिछल रेल ट्रैक कए सड़क बनेबा लेल दैत अछि त ओहि पर फोरलेन सडक बनि सकैत अछि। एहि काज मे रेल प्रशासन स सेहो सहायता लेल जा रहल अछि।
एहि संबंध मे पूमरे क एकटा वरीय अधिकारी कहला जे पटना साहिब स पटना हाट क बीच 2.9 किलोमीटर क दूरी मे रेल ट्रैक बिछल अछि। आर ब्लॉक स दीघा घाट क बीच बिछल नौ किलोमीटर लंबा रेल ट्रैक राज्य सरकार कए देलाक बाद आब पटना साहिब स पटना हाट क बीच क रेल ट्रैक अनुपयोगी भ चुकल अछि। एहन मे रेलवे एकर बेहतर उपयोग करबा लेल विचार करि रहल अछि। पटना हाट मे रेलवे क कई एकड़ जमीन खाली पड़ल अछि। एहि खाली पड़ल जमीन पर स्थानीय लोक सब कब्जा रखने अछि। रेलवे एहि खाली पड़ल जमीन मे रेलकर्मी क लेल आवासीय कॉलोनी बनेबाक विचार करि रहल अछि। अगर एहन मे रेल ट्रैक क स्थान पर सड़क बनि गेल, त रेलकर्मी कए उपयोग करबा मे सुविधा होएत।
दोसर दिस आम लोक कए सेहो आवागमन क सुविधा भ जाएत। पटना सिटी क एहि इलाका मे जाम क समस्या सबस गंभीर अछि। खासकए मालसलामी या माफगंज मंडी जेबा मे। वर्तमान क रेल ट्रैक पर रोड बनला स पटना साहिब स मालसलामी, दीदारगंज आओर मंडी क लेल सीधी सड़क भ जाएत।
उल्लेखनीय अछि जे पटना हाट स दीघा घाट क बीच तत्कालीन रेल मंत्री लालू प्रसाद यादव 2004 मे पैसेंजर ट्रेन क परिचालन शुरू केने छलाह, मुदा रेलवे क लेल इ पैसेंजर ट्रेन सफेद हाथी साबित भेल। एहि क्रम मे नीतीश कुमार आर ब्लॉक स दीघा क बीच बिछल रेल ट्रैक पर सड़क बनेबा लेल रेलवे स जमीन मंगलाह। मुख्यमंत्री क प्रस्ताव पर रेलवे अपन हामी भरि देलक। एकर बाद एहि रूट पर रेलवे क कोनो गाडी नहि चली रहल अछि।
