दोसरसमाचार
पटना। मुख्यमंत्री नीतीश कुमार पासवान जाति क लोक कए आश्वासन देलथि अछि जे हुनको महादलित कए देल जा रहल सबटा सुविधा भेटत। मौका छल वीर शिरोमणि बाबा चौहरमल जयंती क। पटना क मिलर स्कूल मे पासवान जाति क वीर पुरुष चौहरमल क 160म जयंती मनाउल गेल। मुख्य अतिथि नीतीश कुमार छलथि। उप-मुख्यमंत्री सुशील कुमार मोदी,भवन निर्माण मंत्री छेदी पासवान सहित कईटा पासवान जाति क विधायक एहि कार्यक्रम मे शिरकत केलथि।
मुख्यमंत्री कहलथि जे भूमिहीन पासवान जाति क लोक कए जमीन देल जाइत। उप-मुख्यमंत्री सुशील कुमार मोदी कहला जे पंचायत स्तर पर भेल चुनाव मे करीब दू तिहाई मुखिया पासवान जाति स चुनल गेलथि अछि, जे नीतीश कुमार क देन अछि।
नीतीश आ शरद क बीच बढ़ल फासला
एहि कार्यक्रम क उदघाटन जनता दल यूनाइटेड क राष्ट्रीय अध्यक्ष शरद यादव क हाथ स हेबाक छल, मुदा शरद यादव एहि कार्यक्रम मे नहि एलाह। पिछला काफी दिन स नीतीश आ शरद यादव क बीच फासला बढि़ रहल अछि। जेकर शुरुआत महिला आरक्षण बिल कए लकए भेल छल। शरद महिला आरक्षण बिल क विरोध मे छथि, ओतहि नीतीश महिला आरक्षण बिल क समर्थन करैत छथि। एकर बाद प्रदेश जदयू क कार्यकारिणी टीम क गठन मे सेहो शरद यादव कए दूर राखल गेल। हालांकि दूनू पक्ष एखन एहि संबंध मे चुप अछि।
