दोसरसमाचार
पटना। आखिरकार बिहार सरकार क ध्यान मिथिलाक बेटी पर गेल। पता नहि केतबा साल स इ मांग भ रहल छल जे राम नवमी क भांति कम स कम बिहार मे त सीताक जयंती पर अवकाश हेबाक चाही, मुदा एखन धरिक सरकार एहि पर राजी नहि भेल छल। मुदा पर्यटन मंत्री सुनील कुमार पिंटू कहला अछि जे जाहि तरह स भगवान राम क जन्मदिन (रामनवमी) पर सरकारी छुट्टी रहैत अछि, ओहि प्रकार स अगिला साल स सीता क जन्मदिन पर सेहो बिहार मे सरकारी छुट्टी घोषित कैल जा रहल अछि। इ जानकारी पर्यटन मंत्री सुनील कुमार पिंटू एकटा संवाददाता सम्मेलन मे देलथि। ओ कहला जे मिथिलाक लोकक मांग कए देखैत सरकार फैसला केलक अछि जे अगिला साल स रामनवमी क भांति सीता नवमी क दिन सेहो बिहार मे सार्वजनिक छुट्टी होएत। ओ कहला जे एहि स पर्यटन कए सेहो बढावा भेटत। ओना बिहार मे पर्यटकक बढैत संख्या स उत्साहित मंत्री कहला जे बिहार विदेशी पर्यटक क संख्या 6 लाख 36 हजार भ गेल अछि जे पिछला सालक मुकाबला मे 50 प्रतिशत बेसी अछि। ओ कहला जे राज्य क बेहतर विधि व्यवस्था क कारण विदेशी आ घरेलू पर्यटक क संख्या मे लगातार वृद्धि भ रहल अछि। पर्यटन मंत्री क अनुसार 2010 मे 1 करोड़ 91 लाख 28 हजार पर्यटक बिहार पहुंचलाह, जे पिछला साल स 20 प्रतिशत बेसी अछि। ओ कहला जे पर्यटक क संख्या मे आश्चर्यजनक वृद्धि भेल अछि। एहि वृद्धि कए देखैत पर्यटक क सुविधा बढेबा पर विचार कैल जा रहल अछि। ओ कहला जे सड़क क स्थिति नीक भेल अछि ताहि लेल आधुनिक वाल्वो लग्जरी कोच क संचालन पटना-रांची आ पटना -पूर्णिया रूट पर शुरू कैल गेल अछि। ओ कहला जे विमान परिचालक स अनुरोध कैल गेल अछि जे दिल्ली स पटना विमान सेवा कए बोधगया सेहो ल जेबाक व्यवस्था कैल जाए। एहि स पर्यटक कए सुविधा भेटत। पर्यटन मंत्री कहला जे पर्यटन कए बढ़ावा देबा लेल सरकार आओर प्रयास करि रहल अछि। ओ कहला जे भूटान-बिहार क बीच पर्यटन स्पेशल ट्रेन चलेबा लेल योजना तैयार भ चुकल अछि। बिहार राज्य पर्यटन विकास निगम क दिस स संचालित इ ट्रेन प्रत्येक सप्ताह क अंत मे एक दिन चलत। एकर संगहि चेन्नई स बिहार लेल पर्यटन स्पेशल ट्रेन सेहो चलत। एहि अवसर पर विभाग क प्रधान सचिव दीपक कुमार कहला जे पटना मे राति मे पर्यटकक मनोरंजन लेल एखन कोनो खास सुविधा नहि अछि, मुदा विभाग बहुत जल्द राजगीर, बोधगया आ पटना क गोलघर मे लाइट एंड साउंड शो क व्यवस्था करि रहल अछि। एकरा एहि साल क अंत तक पूरा करबाक लक्ष्य राखल गेल अछि।
Many many thanks to BIHAR GOVT. & the Honourable TORISM MINISTER.