दोसरसमाचार
पटना। मुख्यमंत्री नीतीश कुमार कहला अछि जे बैंकिंग सेवा कए प्रदान करबा मे भ्रष्टाचार चिंता क विषय अछि। बैंक स ओ आग्रह केलथि जे बैंक ऋण वितरण क पारदर्शी तरीका निकालल जाए। बैंकिंग मे अगर भ्रष्टाचार बढल त ओ लोकक विश्वास गवां देत। बैंक प्रबंधन कए एहि गप पर निगरानी रखबाक जरूरत अछि जे लीकेज कतए कतए अछि। मुख्यमंत्री नव वित्तीय वर्ष क पहिल राज्य स्तरीय बैंकर्स कमेटी (एसएलबीसी) क बैठक मे इ गप कहलाह। एहि मौका पर उप मुख्यमंत्री सुशील कुमार मोदी कहला जे जे बैंक एसीपी (वार्षिक साख योजना) क दस प्रतिशत स कम हासिल केलक अछि ओकरा इ सोचबाक चाही जे हुनका बिहार मे काज करबाक कोनो मतलब अछि बा नहि। मुख्यमंत्री कहला जे बिहार मे गरीबी अछि तखनो बैंक क डिपाजिट बढैत जा रहल अछि। एहन मे बैंक क सेहो किछु कर्तव्य बनैत अछि। कृषि आ ओहि स संबंधित अन्य सेक्टर मे बेसी स बेसी ऋण देबाक चाही। बुनकर कए ऋण भेटबाक चाही। माइक्रो फाइनेंस क क्षेत्र मे बैंक क उदार रवैया बहुत जरूरी अछि। एखनो 9000 स बेसी गाम बैंकिंग सेवा स नहि जुड़ल अछि। मुख्यमंत्री कहला जे किसान क्रेडिट कार्ड (केसीसी) देल जा रहल अछिमुदा ओहि मे भ्रष्टाचार क गप सुनबा मे आबि रहल अछि। व्यक्ति कए पता नहि अछि जे हुनकर नाम स केतबा क केसीसी अछि आओर केतबा राशि क निकासी भ जाइत अछि। इंदिरा आवास मामला मे सेहो बिचौलिया हावी अछि। पासबुक बिचौलिया क हाथ मे कोना चल जाइत अछि आ ओ कमीशन कोना ल जाइत अछि। एहि लेल इ जरूरी अछि जे ऋण वितरण क पारदर्शी तरीका निकालल जाए। ओ उदाहरण देलथि जे राज्य सरकार क भूजल सिंचाई परियोजना मे कोनो गुंजाइश नहि अछि एहि लेल ओहि मे एसीपी क तहत उपलब्धि काफी कम अछि। बैंक प्रबंधन अपन लोक कए समय रहैत इ बुझा दथि जे लोक आब भ्रष्टाचार बर्दाश्त करबा लेल तैयार नहि अछि। उप मुख्यमंत्री सुशील कुमार मोदी कहला जे बैंक अगर ठीक स प्रयास केने रहिते त हम एसीपी क तहत पूरा उपलब्धि हासिल करि सकैत छलहुं। बारह जिला क हाल इ अछि जे ओहि ठाम लक्ष्य क तहत उपलब्धि पचास प्रतिशत स नीचा अछि। अगर कोई बैंक एसीपी क पचास फीसदी स कम हासिल करैत अछि त बैंक क माध्यम स ओहि पर कार्रवाई क प्रावधान रहबाक चाही। उप मुख्यमंत्री कहला जे एहि पर सेहो ध्यान देल जाए जे फसल बीमा क राशि किसान क खाता मे किया देरी स पहुंच रहल अछि। नव वित्तीय वर्ष मे एसीपी 43 हजार, 200 करोड़ क अछि। वित्तीय वर्ष 2010-11 मे सीडी रेशियो 33.99 प्रतिशत दर्ज कैल गेल। भोजपुर, सीवान, सारण आ लखीसराय मे सीडी रेशियो 25 प्रतिशत स कम दर्ज भेल अछि। 2010-11 मे एसीपी क तहत 37000 करोड़ ऋण वितरण क लक्ष्य छल आओर 25551.56 करोड़ ऋण बांटल गेल जे लक्ष्य क 69.06 प्रतिशत अछि। स्टेट बैंक क अध्यक्ष प्रतीप चौधरी कहला जे हुनकर बैंक द्वारा लागू कैल जा रहल स्कीम मे भ्रष्टाचार क प्रति जीरो टॉलरेंस क नीति अपनाउल गेल अछि।
