दोसरसमाचार
पटना । नेता विरोधी दल क हैसियत स विधानसभा मे अपन पहिल भाषण मे अब्दुल बारी सिद्दीकी इ एहसास करा देलथि जे राज्य मे विपक्षक भूमिका केहन रहत। बदल-बदलल सन सदन मे मौका छल धन्यवाद प्रस्ताव पर बहस क। सिद्दीकी बहसक उच्च स्तर कए पुनर्स्थापित करैत अपन भाषण शुरू केलथि त पूरा सदन हुनका सुनबा लेल शांत आ गंभीर बनि गेल। मुख्यमंत्री नीतीश कए सीधा संबोधित करैत सिद्दीकी कहला- जनता अहांकए अपार बहुमत देलक अछि, कंजूसी जुनि करू। हुनकर अनुसार सरकार हर जिला मे नेतरहाट सन स्कूल, स्थानीय बुनकर क बनाउल परदा-तौलिया, स्थानीय चर्मकार क बनाउल जूता क पुलिस विभाग मे सप्लाई जइसन कईटा वायदा एखन धरि पूरा नहि केलक अछि। ओ प्रसिद्ध अर्थशास्त्री आशीष बोस क गप दोहरा कहला जे जतए 60 प्रतिशत लोक गरीब हुए, ओहि राज्य कए बीमारू राज्य क सूची स अलग केना कैल जा सकैत अछि। एखनो विकास क हर मानक पर प्रदेश नीचला पायदान पर अछि। सिद्दीकी विशेष राज्य क दर्जा क मांग क समर्थन करैत कहला जे जखन केन्द्र मे राजग सरकार छल, तखन उत्तराखंड कए इ दर्जा भेटल। बिहार कए छोड़ि देल गेल। सदन मे अपन कम संख्या क उल्लेख करैत सिद्दीकी कहला जे राजग कए 1.10 करोड़ वोट भेटल अछि आ ओ सत्ता मे अछि मुदा इ नहि बिसरल जाए जे राजद गठबंधन कए एक करोड़ लोक वोट देलथि अछि। एहन मे केवल सदन मे विधायकक संख्या देखि कए बहुत खुश हेबाक स्थिति नहि अछि। हुनकर आरोप क दौरान सत्ता पक्ष क धीरता-गंभीरता बिल्कुल नव गप छल। आओर त आओर भाषण खत्म भेलाक बाद मुख्यमंत्री बधाई या धन्यवाद क मुद्रा मे मेज थपथपा सदन मे एकटा नव परंपराक शुरूआत केलथि।
कुल मिला कए बिहार विधानसभा मे दूटा गप नीक आ उल्लेख करबा योग्य अछि। पहिल इ जे विधानसभा अध्यक्ष उदय नारायण चौधरी नेता प्रतिपक्ष अब्दुल बारी सिद्दीकी कए हुनकर निर्धारित समय स 25 मिनट बेसी बजबा लेल मौका देलथि आ दोसर इ जे मुख्यमंत्री नीतीश कुमार समेत संपूर्ण सत्ता पक्ष बड़ गंभीरता स सिद्दीकी कए सुनैत रहल।
हालांकि एहन कहबा आ मानबा लेल कईटा लोक एखनो तैयार नहि छथि जे सदन मे विधायकक संस्कार बदलि गेल अछि, लोकक कहब अछि जे धीरे- धीरे सबकिछु ओहने भ जाइत, चूंकि आइ पहिल दिन छल, ताहि लेल बहुत किछु औपचारिक सन रहल।
मुदा जेना सदन मे देखल गेल ओ उम्मीद कए विश्वास मे बदलबा लेल काफी अछि। सदन मे जनहित क सवाल पर सत्ता पक्ष क सदस्य अपन सरकार स कोनो समझौता करबा लेल तैयार नहि छलाह। प्रश्नोत्तरकाल क तीनू प्रश्न सत्ता पक्ष क सदस्य क छल। पहिने एहन सवाल पर पूरक प्रश्नक कतार रहैत छल। मुदा एहि बेर एहन किछु नहि भेल। विपक्ष क दिनेश कुमार सिंह अपन छाती पर खाद्य सुरक्षा क मांग स संबंधित पोस्टर बांधि सदन मे घूमि रहल छलाह। नेता प्रतिपक्ष अब्दुल बारी सिद्दीकी हुनका स निवेदन केलथि जे एकरा उतारि लेल जाए। सिंह एकर बाद पोस्टर कए हटा लेलथि। बहरहाल, बिहार क मतदाता क संग बिहारक नेता सेहो बदलि रहल छथि। सदन सार्थक बहस लेल तैयार अछि।
