जम्मू । श्रीनगरमे पंथा चौक इलाकामे चलि रहल मुठभेड़ आब खत्म भ’ गेल अछि. सुरक्षाबल दूटा आओर आतंकीके मारि खसओलक अछि. काल्हि एकटा आतंकी मारि खसाओल गेल छल. एहि तरहे मुठभेड़मे तीनटा आतंकवादी मारि खसाओल गेल. यद्यपि आतंकी स’ लड़ैत एकटा भारतीय जवान सेहो शहीद भ’ गेल अछि. एकटा एएसआई जिनकर नाम बाबू राम छलनि, ओ एहि मुठभेड़मे शहीद भ’ गेलाह.
श्रीनगरक बाहरी क्षेत्रमे शनिदिन सुरक्षा बलक ‘नाका’ दल पर आतंकी द्वारा गोलीबारी करबाक बाद दुनू पक्षक बीच मुठभेड़ शुरू भेल छल. आतंकावादी शनिदिन रातिमे पांथा चौक क्षेत्रमे पुलिस एवं केंद्रीय रिजर्व पुलिस बल (सीआरपीएफ) केर संयुक्त ‘नाका’ पर गोलीबारी कयलक. एकरा बाद सुरक्षाबल इलाकाके घेरि लेलक आ ओहिठाम तलाशी अभियान शुरू कयलक.
दोसरसमाचार
एहि स’ पहिने दक्षिण कश्मीरक पुलवामा जिलामे शनिदिन मुठभेड़क दौरान तीनटा अज्ञात आतंकवादीके सुरक्षाबल मारि खसओने छल. पुलिस आ सेनाक एकटा संयुक्त टीम क्षेत्रमे आतंकवादीक बारेमे विशेष जनतबक बाद जदूरा क्षेत्रक घेराबंदी क’ लेलक. जहिना सुरक्षाबल नुकायल आतंकवादी लग पहुंचल, ओ गोली केर बरखा शुरू क’ देलक आ मुठभेड़ शुरू भ’ गेल.
पुलिस कहलथि, “पुलवामाक जदूरा क्षेत्रमे एक मुठभेड़मे तीन अज्ञात आतंकवादी मारल गेल. हथियार आ गोला-बारूद आदि सामग्री बरामद भेल अछि.” हथियार आ गोला-बारूदमे एकटा एके -47 राइफल आ दू गोट पिस्तौल शामिल अछि. सेना कहलक- “एकटा सैनिक गंभीर रूप स’ घायल भ’ गेल आ चोटक कारण दम तोड़ि देलक.”
इ मुठभेड़ दक्षिण कश्मीरक शोपियां जिलामे चारि आतंकवादीक मारल जयबाक एक दिन बाद भेल, जाहिमे दू गोट ओ आतंकवादी शामिल छल जकर एकटा कश्मीरी पंचक अपहरण एवं हत्यामे हाथ छल.
