बहुत रास शिकायत भेटलाक बाद चण्डीगढ़ पासपोर्ट ऑफिस लेलक फैसला
आब पासपोर्ट लेल नहिं होएत पुलिस वेरिफिकेशन
मणिभूषण झा
चण्डीगढ़ । विवाह करय क किछु दिन बादे कनियाँ क छोड़िकय विदेश भागयवला दूल्हा सबहक पासपोर्ट रद्द कैल जाएत। हजारक संख्या मे एहन शिकायत भेटलाक बाद चंडीगढ़ पासपोर्ट ऑफिस ई कठोर कदम उठेलक । एहि पर काज सेहो प्रारंभ भए गेल अछि, पछिला तीन दिन मे 7टा पासपोर्ट रद्द कैल जा चुकल अछि । एहि काज क करय में पीड़ित महिला सब कर्मचारी सबकए सहयोग कए रहल छथिन्ह । चंडीगढ़ क रिजनल पासपोर्ट आफिसर सिबास कविराज कहलथि जे बहुत पहिने से एहन शिकायत भेंटि रहल छल जे एनआरआई लड़का सब विदेश सँ आबि एतय विवाह करय छथि आ किछु दिन पत्नी संग रहिकय बाद मे हुनका छोड़ि विदेश चलि जाईत छथि । एहन कैकटा केस अछि जहि मे औरत अपन पतिक इंतजार कतेको वर्ष सँ कए रहल छथि मुदा ओ वापस नहिं एलथि ।
तीन दिन में 7 पासपोर्ट रद्द कैल गेल
चंडीगढ़ पासपोर्ट कार्यालय पासपोर्ट रद्द करय क योजना पर काज केनाई प्रारंभ कए देने अछि । पछिला तीन दिन मे 7टा पासपोर्ट रद्द कैल गेल अछि । विदेश भागनिहार दूल्हा सबकए पासपोर्ट रद्द एहिलेल कैल जा रहल अछि जे हुनका सबकए वापस आबय लेल मजबूर कैल जा सकय । चंडीगढ़ आ आसपास क इलाका मे एहन लड़की सबकए संख्या ज्यादा अछि जिनका छोड़ि लड़का विदेश भागि गेल छथि ।
दोसरसमाचार
15 हजार महिला केलथि शिकायत, बेसी पंजाब सँ
रीजनल पासपोर्ट ऑफिस सिबास कविराज क कहब छनि जे एहन महिला क अपन पतिक खिलाफ करबाओल गेल एफआईआर, लुकआउट नोटिस, वारंट वा कोर्ट में चलि रहल केस क कापी देबय पड़तन्हि । एहि सब दस्तावेजक आधार पर पासपोर्ट रद्द कैल जायत । कविराज कहलथि जे एहन 15000 सँ बेसी शिकायत अछि जहिमे महिलाक पति हुनका छोड़ि कए विदेश भागि गेल छथि । एहिमे पंजाबक सबसँ बेसी लोक शामिल छथि । किछु शिकायत हरियाणा सँ सेहो भेटि रहल अछि ।
एम्हर, आब पासपोर्ट लेल नहिं होएत पुलिस वेरिफिकेशन
पासपोर्ट बनेबाक लेल होबयवला पुलिस वेरिफिकेशन क प्रक्रिया आब पासपोर्ट आफिस खत्म कए देलक । आब खाली संबंधित थाना मे आवेदक क क्रिमिनल रिकॉर्ड देखल जायत । पहिने पुलिस आवेदक क घर जा कए वेरिफिकेशन करैत छल आ दू टा गवाहक साईन सेहो आवश्यक होईत छल । आब आवेदक बताओल गेल पता पर रहय छथि कि नहि ओ पोस्टमैन कन्फर्म कए पासपोर्ट ऑफिस कए बताओत। जों आवेदक ओहि एड्रेस पर नहिं रहैत हेताह त पासपोर्ट डिलिवर नहिं होएत।
