पटना। देश क पांचम आ ईस्टर्न इंडिया क पहिल सबस बेसी क्षमता वाला घुमंतू रेस्तरां (बिस्कोमान टावर) क उद्घाटन मुख्यमंत्री नीतीश कुमार अगस्तक पहिल सप्ताह मे करताह। इ जानकारी सहकारिता विभाग क प्रधान सचिव अमिताभ वर्मा घुमंतू रेस्तरां क निरीक्षण क क्रम मे देलथि। रेस्टोरेंट 18म तल्ला पर अछि। एकर ऊंचाई करीब 210 फीट अछि। एहि रेस्टरां स गांधी मैदान एकटा छोट सन पार्क नजरि अबैज अछि। ओ रेस्तरां क सजावट कए सेहो सराहलाह। ओ एकरा लेल बिस्कोमान अध्यक्ष कए धन्यवाद सेहो देलाह। वर्मा कहला जे घुमंतू रेस्तरां मे 140 गोटेक बैसबाक व्यवस्था कैल गेल अछि। एकर खासियत इ अछि जे इ एक एचपी क मोटर पर चलि रहल अछि। जाहि स इ 60 मिनट मे एक चक्कर पूरा करैत अछि। गंगा क दृश्य सेहो एहि ठाम स देखल जा सकैत अछि। वर्मा कहलथि जे मुंबई मे दू आ जयपुर आ अहमदाबाद मे एक एकटा एहने घुमंतू रेस्टोरेंट अछि। प्रधान सचिव 17म तल पर 60 गोट लेल एक संग बैसबा योग्य बार क निरीक्षण सेहो केलथि। ओ बार लेल लाइसेंस भेटबाक मे आबि रहल व्यावधान कए दूर करबाक भरोस दियौलथि। रसोई 17म तल पर अछि। एहि ठाम स तैयार सामाग्री लिफ्ट स घुमंतू रेस्तरां मे स्वचालित प्रणाली द्वारा जाएत। 16म तल पर एकटा सभागार आ खुलल गार्डेन बनाउल गेल अछि। जतय 300 गोटे लेल कार्यक्रम आयेाजित कैल जा सकैत अछि। एकरा विवाह अथवा पार्टी जइसन आयोजन क लेल बुक कैल जा सकैत अछि। निरीक्षण क क्रम मे प्रधानसचिव बिकोमान क कार्य क खूब तरीफ केलथि। 1988 मे बिस्कोमान प्रबंध समिति भंग भेलाक बाद एकर स्थिति दयनीय भ गेल छल। एहि अवसर पर बिस्कोमान अध्यक्ष सुनील कुमार सिंह कहला जे घुमंतू रेस्तरां बिहार कए सौगात क रूप मे भेट रहल अछि। ओ कहला जे शाकाहारी, मांसाहारी भोजन, नाश्ता, काफी सहित विभिन्न तरह क व्यंजन एहि ठाम उचित दाम पर भेटत। दाम एहन राहल गेल अछि जे आम आदमी सेहो घुमंतू रेस्तरां मे आबि कए नास्ता आ भोजन करि सकत।
