दोसरसमाचार
पटना। बिहारक पहिल एक्सप्रेस-वे बनबाक बाट साफ भ’ गेल अछि। इ मगध क्षेत्रक औरंगाबाद स’ मिथिलाक जयनगर धरि बनत। दक्षिण स’ उत्तर बिहारके जोड़यवला औरंगाबाद स’ नेपाल सीमा पर स्थित जयनगर धरि बनयवला 271 किमी लम्बा सड़कके भारतीय राष्ट्रीय राजमार्ग प्राधिकरण (एनएचएआई) केर भू-अर्जन समिति मंजूरी द’ देलक अछि। अधिसूचना जारी होइते नार्थ-साउथ कॉरिडोर सेहो कहल जायवला एहि सड़कक लेल भू-अधिग्रहण काज शुरू होयत.
पटना सहित बिहारक 6 गोट जिला स’ भ’ गुजरत एक्सप्रेस-वे
आबयवला दिनमे एकर टेंडर आ फेर निर्माण शुरू भ’ जायत. इ सड़क पटना सहित बिहारक 6 जिला स’ भ’ गुजरत। एहि सड़क स’ पटनाक गया आ दरभंगा एयरपोर्ट स’ सोझे संपर्क भ’ जायत। संगहि एकर संपर्क जीटी रोड स’ सेहो भ’ जायत. सड़क बनयबाक जिम्मा एनएचएआईके देल गेल अछि। जमीनक उपलब्धता एवं टैफिक घनत्वक अनुसार एहि सड़कक एलाइनमेंट तय कयल गेल अछि।
दरभंगा एयरपोर्ट लग स’ गुजरैत जयनगरमे समाप्त
औरंगाबादक मदनपुर स’ शुरू होमयवला इ फोरलेन सड़क गया एयरपोर्टक बगल स’ होएत जीटी रोडके सेहो संपर्कता प्रदान करत। गया स’ इ जहानाबाद आ नालंदाक बॉर्डर स’ गुजरैत पटनामे कच्ची दरगाहमे आयत. एहिठाम स’ बिदुपुरक बीच बनि रहल 6 लेन पुल स’ चकसिकंदर, महुआक पूरब होएत ताजपुर जायत। ओतय स’ दरभंगा एयरपोर्ट लग स’ गुजरैत जयनगरमे समाप्त होयत.
बिहारक पहिल एक्सप्रेस-वे औरंगाबाद-जयनगर सड़क ग्रीन फील्ड होयत. भारतमाला योजनाक अंतर्गत बनयवला एहि सड़कमे 80 प्रतिशत ग्रीन फील्ड राखल गेल अछि। ग्रीन फील्डक अर्थ अछि जे एहि कॉरिडोरमे 80 प्रतिशत नव सड़क होयत.
आधिकारिक अनुसार इ सड़क बिहारक लेल नार्थ-साउथ कॉरिडोरक काज करत। एहि सड़कक बनला स’ दक्षिण बिहार सोझे नेपाल स’ जुड़ि जायत। ट्रकक लेल इ सभ स’ उपयोगी सड़क होयत। खास क’ बिहार स’ नेपालक बीच सामानक आवाजाही आओर आसान भ’ जायत। एहि सड़कक एलाइनमेंट एहन राखल गेल अछि जे कम स’ कम जमीन अधिग्रहणक जरुरति पड़त। एकरा लेल पहिनहि स’ बनल ग्रामीण सड़कक सेहो उपयोग कयल जायत। वैशाली स’ समस्तीपुर एवं दरभंगा होएत नेपाल सीमा पर जा क’ जयनगरमे इ सड़क खत्म होयत। एहि तरहे फोरलेन बनयवला इ सड़क पटनाक अलावा औरंगाबाद, जहानाबाद, वैशाली एवं मधुबनी स’ भ’ गुजरत.
