सहरसा । आगामी 10-11 नवंबर कए सहरसा मे फिल्म फेस्टीवल क आयोजन कोसी क्षेत्र कए लोग कए खाली सिनेमा देखेबाक लेल नहि होएत । ई आयोजन होएत कोसी क्षेत्र मे सिनेमा क भविष्य तकनाय पर । ई आयोजन होएत लोकभाषा आ लोककला क संरक्षण क लेल । ई आयोजन होएत कोसी क ओ कलाकार कए गामक मोन पड़ेबाक लेल जे मुंबई क मायानगरी मे भटैक कए गामक रस्ता बिसैर गेल छल । ई आयोजन होएत कोसी क ओ कलाकार कए फेर से एक बेर पहचान दिएबाक लेल जे सिनेमा क लेल कहियो अपन सर्वस्व लुटेने छल । ई आयोजन होएत कोसी क युवा कए एक मंच पर अनबाक लेल जे जीवन क भागादौड़ी मे खाली सोशल मीडिया पर जुटान करैत छथि ।
कोसी शुरूए स ज्ञान क भूमी रहल अछि, एक से एक विचारक आर ज्ञानी मनुख क ई जन्मस्थली आऔर कर्मस्थली रहल अछि । फेर चाहे गप पूर्व मीमंसा आओर अद्वैतवाद क प्रखर विद्वान मंडण मिश्र क होए, वा विदुषी भारती क । लोकदेवता कारू खिरहरि क होए वा परम संत लक्ष्मीनाथ गोसाई क । कोसी नहि केवल ज्ञान क विपुल भंडार रहल छल अपितु राजकमल चौधरी, मनोरंजन झा, मायानंद मिश्र, आओर महाप्रकाश, साकेतानंद जेहन साहित्य सेवी क धरती सेहो रहल छल, जे अपन अनुपम ज्ञानक खजाना से संपूर्ण जगत कए रौशन केने छथि । कला क क्षेत्र मे जों गप करी त ई मांगैन खबास, पंडित रधु झाक संग, बनैली क कुमार आऔर शास्त्रीय संगीत क मर्मज्ञ श्यामानंद सिंह क धरती सेहो रहल अछि । आधुनिक युग में सेहो ई सुशांत सिंह राजपूत, राजशेखर, उल्का गुप्ता, पंकज झा, राहुल सिन्हा, रामबहादुर रेणु आदि कलाकार कए जनमेले अछि ।
एहि धरती पर कोसी क पहिल फिल्म फेस्टीवल क आयोजन दिनांक 10-11 नवंबर कए सहरसा मे होमय जा रहल अछि । एहि फिल्म फेस्टीवल क माध्यम से कोसीक कला, संस्कृति, ज्ञान आऔर लोकभाषा क विस्तार त भेटबे करत संगे संग कोसी मे फिल्मक संभावना पर सेहो चर्चा होएत । एहि आयोजन मे 10-11 तारीख तक विभिन्न प्रकार फिल्म दर्शक कए देखाओल जाएत आ फेर ओहि फिल्मक मादे परिचर्चा सेहो होएत । एहि परिचर्चा सए युवा कए सिनेमा क बारीकी बुझबा मे आसानी होएत संगे आयल अतिथि कोसी मे सिनेमा क भविष्य क प्रति सेहो आश्वस्त भए सकत ।
आयोजक कमीटी जनतब देलथि जे बिहार क सभ कलाकार स गप करबाक प्रयास कैल जा रहल अछि आ उम्मीद अछि जे सब कलाकार शामिल भए सकय । पंकज झा, अखिलेन्द्र मिश्र, सतीश सिंह राजपूत आदि अभिनेता सेहो कोसी फिल्म फेस्टीवल मे शिरकत करत ।
आयोजन लेल फिल्म क एंट्री एहि लिंक से ( https://filmfreeway.com/koshifilmfestival ) होएत । इक्षुक फिल्ममेकर एहि लिंक पर जाकए अपन फिल्म एंट्री कए सकैत छथि ।
दोसरसमाचार
बेस जानकारी लेल फेस्टीवल क पेज https://facebook.com/koshifilmfestival पर विजिट कैल जा सकैत अछि ।
