दोसरसमाचार
पटना । राज्य क प्राथमिक विद्यालय मे शिक्षक क चयन लेल प्रस्तावित शिक्षक प्रात्रता परीक्षा तीन आ चारि दिसंबर कए होएत। दूनू दिन दू- दू पाली मे परीक्षा क आयोजन होएत। चार दिसंबर कए पहिल पाली मे पेपर वन क परीक्षा होएत। दोसरी पाली मे पेपर टू क परीक्षा होएत। एहि मे वर्ग छह स आठ क लेल आवेदन करनिहार शामिल हेताह, एहन अभ्यर्थी क संख्या लगभग आठ लाख अछि। एकरा लेल 21 स 25 नवंबर तक प्रवेश कार्ड पहुंचा देल जाएत। मानव संसाधन विकास मंत्री प्रशांत कुमार शाही, प्रधान सचिव अंजनी कुमार सिंह सहित अन्य आलाधिकारीक भेल एकटा बैसार मे परीक्षा क तिथि तय कैल गेल। टीइटी क बाद एसटीइटी परीक्षा होएत।एकरा लेल 24 अक्तूबर कए बैसार अछि।
शिक्षा सचिव कहला जे परीक्षा मे लगभग 26 लाख आवेदक शामिल भेल अछि। आवेदनपत्र गलत भरलाक कारण लगभग 6.5 प्रतिशत आवेदन रद्द कैल गेल अछि। एकर संख्या एक लाख 60 हजार अछि। ओना इ आंकडा एखन 14 जिलाक अछि। आवेदन रद्द हेबाक इ आंकडा घट या बढ़ सकैत अछि। एहन आवेदन क जिलावार संख्या प्रकाशित कैल जाएत। ओकर पूरा ब्योरा वेबसाइट पर होएत, ताकि आवेदक कए अपन गलती क जानकारी भेट सकए।
सचिव कहला जे 21 स 25 नवंबर क बीच ओहि स्कूल स आवेदक कए एडमिट कार्ड भेटत ,जतए स जे आवेदन लेलक आ जमा केलक अछि। परीक्षा क लेल प्रश्नपत्र बनेबाक जिम्मेवारी बिहार विद्यालय परीक्षा समिति आ एससीइआरटी क अछि। अनुमंडल स्तर स लकए जिला स्तर क स्कूल-कॉलेज मे परीक्षा केंद्र होएत। एक केंद्र पर लगभग 500 अभ्यर्थी क बैसबाक व्यवस्था होएत। एसटीइटी क बाबत सचिव कहला जे एहि मे 27टा विषय क लेल परीक्षा आयोजित कैल जाएत। एहि लेल कुल अभ्यर्थी क संख्या लगभग पांच लाख 28 हजार अछि। विभाग क प्रवक्ता आरएस सिंह कहला जे कदाचाररहित परीक्षा क लेल बीएसइबी आ एसटीइटी कए आवश्यक निर्देश देल जा चुकल अछि। आवश्यकता पडल त मैट्रिक क तर्ज पर वीडियोग्राफी सेहो करबा सकैत छी।
