पटना। सडकक मामला मे सही मे बिहार बहुत बदलि गेल अछि। एकटा जमाना छल तहिया बिहार मे सडक बनेबा लेल कियो तैयार नहि होइत छल। निविदा पर निविदा बाहर होइत छल आ कियो निविदा भरबा लेल सामने नहि अबैत छल। आइ स्थिति आ परिस्थिति दूनू बदलल अछि। बिहार मे आब बीओटी टाल पर सेहो सउक बनि रहल अछि आ सेहो प्रीमियम दर पर। बरौनी-मुजफ्फरपुर सड़क जे एनएच 28 अछि कए एकटा निर्माण कंपनी प्रीमियम क संग लेलक अछि जे ओ निर्माण पूरा भेजाक बाद अगिला बीस साल तक प्रति वर्ष पांच करोड़ टका एनएचएआई कए देत। एहन बिहार मे एखन धरि कोनो आन सडक लेल नहि भ सकल छल। एनएचएआई हाल मे एहि सड़क क निविदा प्रक्रिया कए अंतिम रूप देने छल। केएनआर पटेल नाम क निर्माण कंपनी एहि सड़क कए कुल 356 करोड़ टकाक राशि लगाकए बना रहल अछि। एहि सड़क क प्रीमियम क रूप मे एनएचएआई कए 107 करोड़ टका भेटत। तीन साल मे एहि सड़क क निर्माण कार्य पूरा हेबाक अछि। इ सडक बनलाह स झारखंड आ नेपाल क सड़क कनेक्टिवटी बढत। रजौली स बख्तियारपुर क बीच फोर लेन पहिने स्वीकृत भ चुकल अछि। इ सड़क बख्तियारपुर स खगडि़या क बीच बनि रहल चारि लेन क सड़क स जुड़त। मोकामा मे एकरा लेल एकटा अतिरिक्त पुल सेहो बनत। जाहि लेल निविदा प्रक्रिया अंतिम चरण मे अछि। बख्तियारपुर-ताजपुर क बीच गंगा नदी पर सेहो पीपीपी मोड मे मेगा ब्रिज निर्माण क निविदा प्रक्रिया पूरा भ चुकल अछि। एहि सड़क स ईस्ट-वेस्ट कारिडोर क सड़क क कनेक्टिवटी सेहो अछि। गोरियाकोठी होइत इ सडक रक्सौल चल जाइत अछि। दरभंगा आ मधुबनी सेहो सीधा तौर पर जुडि जाएत।
