दोसरसमाचार
पटना। झांसी की रानी बनि कए अपन प्रतिभा क लोहा मनवा चुकल सहरसा क बेटी उल्का गुप्ता आब सिनेमा मे काज करबा लेल तैयार छथि। उल्का जल्द राजनीति पर आधारित फिल्म मे उत्तर प्रदेश क मुख्यमंत्री मायावती क भूमिका निभौती। सहरसा क जननाट्य संस्था इप्टा द्वारा सम्मानित भेलाक बाद ओ कहलीह जे हुनका महज आठ साल मे अभिनय करबाक मौका भेटल। चौदह वर्षीय उल्का मुंबई क रुस्तमजी इंटरनेशनल स्कूल मे नौंवी क छात्रा छथि। ओ कहलीह जे परीक्षा क बाद ओ राजनीति पर आधारित फिल्म मे मायावती क भूमिका करए जा रहल छथि।
एखन धरिक सफरक बारे मे ओ कहलीह जे गरीब परिवार मे पलल-बढ़ल हुनकर पिता गगन गुप्ता 1980 मे मुंबई चल गेलथि। उल्का कहलीह जे आठ सालक उम्र मे हुनका पहिल बेर कैमरा क सामना करबाक मौका भेटल। एकर बाद जीटीवी पर चलल धारावाहिक सात फेरे, स्टार वन पर रस्में सहित झांसी की रानी मे ओ मुख्य भूमिका निभेलथि। सोनी टीवी क कॉमेडी सर्कस, पलकों की छांव मे सेहो ओ काज करि चुकल छथि। ओ नचले मे गेस्ट स्टार क भूमिका केने छथि।
उल्का कए कईटा राष्ट्रीय स्तर पर सम्मान सेहो भेट चुकल अछि। पिता कए अपन प्रेरणा माननिहारि उल्का अपन माटी क भाषा मैथिली बखूबी बुझैत आ बजैत छथि।
