दोसरसमाचार
पटना । महात्मा गांधी सेतु आब नेशनल हाइवे अथॉरिटी ऑफ इंडिया (एनएचएआइ) क जिम्मा मे चल गेल। आब एनएचएआइ एहि पुल क मरम्मत करबा लेल प्रयास करत। पटना क पहाड़ी स्थित जीरो माइल स हाजीपुर क रामाशीष चौक तक पुल समेत सड़क एनएचएआइ कए एहि उम्मीद स देल गेल अछि जे ओ बिहारक एहि जीवन रेखा कए नव जीवन प्रदान करत। केंद्रीय सड़क परिवहन आ राजमार्ग मंत्रालय इ निर्णय करत जे महात्मा गांधी सेतु क मरम्मत लेल कोन तरीका अपनाउल जाए। सोमदिन केंद्रीय सड़क आ परिवहन मंत्रालय आओर राज्य सरकार क बीच पटना मे एहि पर सहमति बनल। मंत्रालय क सचिव आ बिहार कैडर क आइएएस अधिकारी एके उपाध्याय आ राज्य सरकार दिस स पथ निर्माण विभाग क सचिव प्रत्यय अमृत एहि पर चर्चा केलथि। बैठक क बाद उपाध्याय कहला जे पुल क सुपर स्ट्रक्चर बदलबा लेल नव सिरा स अध्ययन कैल जाएत। एखन धरि क मरम्मत आ एखन धरि क खराबी क आकलन करि फिजिबिलिटी रिपोर्ट तैयार कैल जाएत। एकर बाद कोनो आगूक कार्रवाई कैल जाएत। केंद्र सरकार क एहि निर्णय स राज्य सरकार राहत क सांस लेलक अछि। एकर संगहि एहि पुल कए ल कए संशय क स्थिति खत्म भ गेल। ज्ञात हुए जे गैमन इंडिया क डिजाइन कैल एहि 5575 मीटर लंबा पुल मे कुल 48टा पाया अछि। एकर निर्माण 1979 मे प्रारंभ भेल आ पूर्ण रूप स तैयार हेबा स पहिने तत्कालीन मुख्यमंत्री क आग्रह पर प्रधानमंत्री इंदिरा गांधी मई,1982 मे एकर उद्घाटन करि देलथि। कुल 65 करोड़ क लागत स बनल इ पुल महज 20 साल मे मौतक कगार पर पहुंच चुकल अछि। जखन कि गांधी सेतु राष्ट्रीय राजमार्ग 19 क हिस्सा बनाउल गेल अछि। केंद्रीय सचिव उपाध्याय अपन पटना यात्राक दौरान पथ निर्माण मंत्री नंदकिशोर यादव स सेहो भेंट केलाह। ओ मंत्री क समझ इ आश्वासन देलथि जे शीघ्र गंगा पुल क मरम्मत शुरू होएत। एकर अलावा नेशनल हाइवे 107 पर कोसी नदी पर बनल डुमरी पुल क मरम्मत पर सेहो केंद्र आ राज्य क बीच सहमति बनल अछि। इ तय कैल गेल अछि जे 16 अगस्त कए एकरा लेल निविदा जारी करि देल जाएत। राज्य सरकार एहि पुल क चारिटा पाया आ ओकर बीच क स्पैन क निर्माण लेल करीब सौ करोड़ क आवश्यकता जतेलक अछि। डुमरी पुल क दूटा पाया घंसला स अक्तूबर, 2010 स एहि पर आवागमन बंद अछि। बाद मे आइआइटी, रूडकी क इंजीनियर करीब आधा दर्जन पाया मे खराबी क गप कहलक। इ पुल बंद भ गेला स कोसी क कईटा जिलाक पटना स सीधा संपर्क भंग अछि। सरकार विकल्प क तौर पर डुमरी पुल लग एकटा स्टील पुल क निर्माण केलक अछि जे जल स्तर बढ़ला पर बंद भ जाइत अछि। खगड़िया-पूर्णिया फोर लेन पर पथ निर्माण मंत्री कहला जे खगड़िया स पूर्णिया तक नेशनल हाइवे कए फोर लेन मे तब्दील करबाक मांग पर परिवहन मंत्रालय सैद्धांतिक रूप स सहमत भ गेल अछि। उपाध्याय कहला जे एनएचडीपी-3 क सबटा 1015 किलोमीटर सड़क कए फोर लेन करबाक प्रस्ताव पर केंद्र सरकार गौर करत। ओ इस्ट वेस्ट कॉरीडोर क निर्माण कार्य कए मार्च, 2012 तक पूरा करबा लेल राज्य सरकार स अररिया आ सुपौल मे जमीन अधिग्रहण क कार्य शीघ्र पूरा करबाक लेल कहलथि अछि।
