दोसरसमाचार
तेतरिया (बांका) स समदिया
बांका जिला क कटोरिया प्रखंड स्थित तेतरिया गाम। ताड़ क पत्ता क छतरी तर बिछल पटिया पर बैसल गेट्स क मुंह स निकलल पहिल शब्द -सोल आफ इंडिया इज रियली फाइन। इ केवल शब्द तक सीमित नहि रहल।
दुनिया क दोसर सबस अमीर आदमी जखन चटाई पर संग बैसल महिला स गप शुरू केलथि त समय कम भ गेल। स्थिति इ रहल जे हुनकर निजी सचिव बेर-बेर घड़ी दिस इशारा करैत रहलाह आ समयक पाबंद बिल ओकरा अनसुना करैत रहलाह। महिला स ओ घर स ल कए बाहरक स्थिति तक पर चर्चा केलथि। पति क व्यवहार, आर्थिक विकास मे पति क भूमिका जइसन प्रश्न मे भेटल उत्तर स ओ अपना कए इ बुझेबा मे असमर्थ भ रहल छलाह जे इ महिला अशिक्षित छथि।
एहि दौरान ओ दुभाषिए क जरिए महिला स खूब मजाक सेहो केलथि। महिला क किछु गप पर त आंखि-भौं चमका कए आश्चर्य जतेलथि, मुदा हुनकर गरीबी आ विकास स दूर रहबाक चर्चा मे ओ गंभीर मुद्रा मे सोचए लगैत छलाह। गेट्स गाम कए बुझबा-परखबाक कोनो कोशिश बाकी नहि रखलथि।
हेलीकाप्टर स उतरबाक बाद ओ सर्वप्रथम महिला संगठन द्वारा जलछाजन क तहत गाम मे तैयार पोखरि देखबा लेल विदा भेलाह। पोखरि देखी ओ कहला जेएतबा गर्मी मे त इ स्वीमिंग पुल क काज करत। फेर ओ महिला द्वारा तसर उत्पादन क लेल कैल गेल अर्जुन क खेती देखबा लेल विदा भेलाह। खेत क आडि़ पर चलैत गेट्स पूछला जे एहि में पाइन कोनो देल जाइत अछि। उत्तर भेटल वर्षा जल एकमात्र स्रोत अछि।
आदिवासी महिला जखन गीत गाबिकए हुनकर स्वागत केलथि त ओ एकबेर नहि कई बेर- हाऊ स्वीट कहबा लेल विवश भेलथि। रौद स बचबा लेल महिला द्वारा साड़ी स तैयार छतरी कए ओ बेर-बेर देखैत रहलाह। बाद मे किछु बच्चा कए देखि इ बुझबाक प्रयास केलथि जे हिनकर टीकाकरण होइत अछि कि नहि। लगभग डेढ़ घंटा तक पटिया पर बैस बिल गेटस महिला स गप करैत रहलाह। कुर्सी लेल मारामारी करनिहार अधिकारी आ नेता स अलग दुनिया क एहि अमीर कए एहि तरह स पटिया पर बैसल देख पूरा गाम भी भौंचक छल।
