पटना । बिहार राज्य चीनी निगम क पिछला कई सालक प्रयास आब रंग अनबा लेल तैयार अछि। बिहार मे बंद 15 टा चीनी मिल मे स छहटा मिल स धूआं निकलबा क घोषणा अगिला वित्त वर्ष मे भ सकैत अछि।
खुली रहल छहटा मिल मे स सबस पहिने लौरिया आ सुगौली स धूआं निकलबाक उम्मीद अछि।
एहि दूनू मिल कए हिन्दुस्तान पेटोलियम लिमिटेड लगभग तैयार कए चुकल अछि आ दूनू मिल एखन परीक्षणक दौर मे अछि। सब किछु ठीक रहल त एहि मिल स औद्योगिक उत्पादन एहि मास स शुरू भ जाएत।
एहिना दोसर दौर मे बिकायल रैयाम आ सकरी चीनी मिल सेहो टीआइएल कए सौंपल जा चुकल अछि। एहि मिलक लगभग 50 फीसदी राशि सरकारी खाता मे राखल जा चुकल अछि। टीआइएल रैयाम मिल कए खोलबा लेल काज शुरू करि चुकल छथि। आशा अछि जे रैयाम मे एहि मास मे मिल लागब शुरू भ जाएत। कंपनीक एकटा अधिकारीक कहब अछि जे अगिला सीजन मे एहि मिल स धूआं निकलैत देख सकैत छी।
मोतीपुर आ बिहटा चीनी मिल आइपीएल आ दिल्लीक प्रीस्ताइन लोजेस्टिक कीनलक अछि। हाल फिलहाल मे मोतीपुर चीनी मिल सेहो इंडिया पोटास लिमिटेड कीन लेलक अछि। कंपनी दिस स खरीद राशिक 40 फीसदी रकम बिहार सरकार कए द देल गेल अछि। निगम आयुक्त जयमंगल सिंहक कहब अछि जे मिल क बकाया कर्मचारी सब कए देल जा रहल अछि आ बिका चुकल मिलक कर्मचारी कए आब कोनो बकाया नहि अछि। ओ कहला जे बाकी बचल मिल कए खोलबाक प्रयास तेज कैल जा रहल अछि। हुनक कहब अछि जे पहिने जे कंपनी मिल खरीद लेल सामने आयल आ सरकार संग अनुबंध केलाक बाद मिल खोलबा लेल प्रयास नहि केलक ओकरा अनुबंद खत्म करबा लेल कार्रवाई शुरू कैल जा रहल अछि। आशा केल जा रहल अछि जे एहि छहटा मिल कए खुललाक बाद बाकी मिल लेल सेहो उद्यमी सामने अउताह।
