पटना । नव साल क मौका पर ममता बनर्जी पटनाक लोक कए बड पैघ सनेस देलथि अछि। रेल मंत्री ममता बनर्जी क आदेश पर रेल मंत्रालय बिहार सरकार क छह साल पुरान मांग मांगि लेलक अछि। अंग्रेज द्वारा बनाउल गेल डेढ सौ साल पुरान रेल लाइन क जगह पर आब छह लेनक सडक बनबाक बाट साफ भ गेल। पटना शहरक यातायात पिछला छह साल मे बहुत बढि गेल अछि, ताहि लेल सरकार शहरक बीच स गेल पटना दीघा लाइन क जमीन सडक बनेबा लेल मांगि रहल छल। आर ब्लॉक स दीघा तक करीब नौ किलोमीटर लंबा इ लाइन बहुत दिन स बंद छल, लालू क कार्यकाल मे एहि पर सवारी गाडी चलाउल गेल, मुदा लोकप्रिय नहि भेल, एहन मे एकरा खत्म करबाक मांग जोर पकडि लेलक। दोसर दिस एहि इलाका मे सडक जाम क समस्या बिकराल भ गेल अछि आ वर्तमान सडक क चौडाई नहि बढाउल जा सकैत अछि। एहन मे इ विकल्प सर्वमान्य छल।
पिछला साल अगस्त मे नीतीश कुमार ममता बनर्जी क सामने इ प्रस्ताव रखने छलाह जे अगर इ लाइनक जमीन रेलवे राज्य सरकार कए दैत अछि त सरकार रेलवे कए एकर बदला मे नबीनगर मे जमीन मुहैया करा दैत जाहि ठाम रेलवे क बिजली घर लागी रहल अछि। मुदा रेलवे एहि प्रस्ताव कए खारिज करैत मांग केलक अछि जे एहि जमीनक बदला मे ओकरा हाजीपुर मे जमीन उपलब्ध करौल जाए जाहि स ओ अपन मुख्यालयक विस्तार कए सकत। राज्य सरकर रेल मंत्रालय क इ मांग मानि लेलक अछि, जाहि स मामला निपटी गेल। सड़क परिवहन मंत्री नंद किशोर यादव कहला अछि जे अगिला वित्त वषर्् मे एहि पर काज शुरू भ जाएत। राज्य सरकार एकर बदला मे हाजीपुर मे रेलवे कए जमीन दैत। रेलवे ईस्ट-सेंट्रल रेलवे मुख्यालय क विस्तार क लेल राज्य सरकार स जमीन मंगलक अछि।
