रोमा उत्पल झा
नई दिल्ली। पंजाब बिहारी मजदूरक कमी स परेशान अछि, त नवीन ओखला औद्योगिक विकास प्राधिकरण (नोएडा) क छोट आओर मझोले उपक्रम (एसएमई) सेहो पर्याप्त मात्रा मे बिहारी मजदूर नहि भेब्बा स परेशान भ गेल अछि। करीब 8000 इकाइवाला इ औद्योगिक क्षेत्र कए मजदूर नहि भेट रहल अछि। एहि कारण स कारोबार प्रभावित भ रहल अछि।
नोएडा इंटरप्रेन्योर एसोसिएशन क अध्यक्ष राकेश कत्याल एकटा अखबार स गप करैत कहला जे नोएडा क औद्योगिक इकाइ पहिने स पर्याप्त बिजली आओर नीक सड़क क अभाव झेल रहल अछि, एहन मे मजदूरक कमी मुश्किल आओर बढ़ा देलक अछि।
इंडियन इंडस्ट्रीज एसोसिएशन (आईआईए) नोएड़ा चौप्टर क अध्यक्ष एनके खरबंदा क कहब अछि जे नोएडा मे बिहार स मजदूर अबैत छल, मुदा आब बिहार मे मजदूर कए स्थानीय स्तर पर काज भेटए लागल अछि। खरबंदा कहैत छथि जे महात्मा गांधी राष्ट्रीय ग्रामीण रोजगार गारंटी योजना (मनरेगा) मे काज आओर टका नीक भेटबा स मजदूर नोएडा स दूर होइत जा रहल छथि। एहि संबंध मे कत्याल क कहब अछि जे मजदूर क कमी क चलते मजदूरी मे सेहो इजाफा भेल अछि, तखनो मजदूर क भारी कमी अछि। अधिकतर कंपनीक गेट पर मजदूरक आवष्यकता संबंधी विज्ञापन टांगल अछि। कत्याल क मुताबिक दिल्ली मे राष्ट्रमंडल क कारण मजदूर क संकट आओर गहरा गेल अछि। संगहि बिहार मे खेती आ त्योहारक संग-संग चुनावक समय भेला स मजदूर कम आबि रहल छथि। खरबंदा कहला जे दिल्ली मे पसरल बीमारी क कारण सेहो इकाइ मे मजदूर क कमी बढ़ि गेल अछि।
मजदूर क कमी स कारोबार मे गिरावट आबि रहल अछि। कत्याल कहला जे मजदूर क भारी कमी क कारण औद्योगिक इकाइ मे उत्पादन घटि रहल अछि। हुनकर मुताबिक एहि मास उत्पादन मे 50 फीसदी तक क गिरावट देखल जा रहल अछि। उत्पादन घटबा स ऑर्डर पूरा करबा मे दिक्कत भ रहल अछि।
खरबंदा कहैत छथि जे बिहारी मजदूरक कमी आ कमीक कारण मजदूरक बढैत डिमांड स नोएडा क कारोबारी कए नुकसान भ रहल अछि।
