दोसरसमाचार
सुपौल एसएसपी स सीबीआई क निदेशक तक
मधुबनी मे देलक पहिल बेर एसपी क रूप मे सम्मान
नई दिल्ली। भारतीय पुलिस सेवा क वर्ष 1974 बैच क बिहार कैडर क अधिकारी रंजीत सिन्हा बिहार स पहिल आईपीएस छथि जिनका सीबीआई क निदेशक बनाउल गेल अछि। श्री सिन्हा वर्ष 1991 स ल कए वर्ष 2001 तक केन्द्रीय प्रतिनियुक्ति पर छलाह जखन कि वर्ष 2001 मे बिहार घुरलाक बाद फेर स वर्ष 2004 मे केन्द्रीय प्रतिनियुक्ति पर चल गेल छलाह। फिलहाल श्री सिन्हा आईटीबीपी क महानिदेशक क पद पर काज क रहल छथि। ओना भाजपा हिनक नियुक्ति क प्रक्रिया क विरोध करैत अधिसूचना कर रद्द करबाक मांग केलक अछि।
गृह (आरक्षी) विभाग स प्राप्त जानकारी क अनुसार श्री सिन्हा अगिला वर्ष 31 मार्च कए सेवानिवृत्त हेबाक छल मुदा आब सीबीआई क निदेशक क पद पर तैनात भेलाक बाद हुनक कार्यकाल दू साल होएत। यानी हुनकर सेवा अवधि वर्ष 2014 क नवम्बर तक विस्तारित भ जाएत।
बिहार कैडर क आईपीएस अधिकारी श्री सिन्हा करियर क शुरुआत बतौर अपर पुलिस अधीक्षक (एएसपी) क रूप मे सुपौल जिला क वीरपुर अनुमंडल स केने छथि। तखन वीरपुर सहरसा जिला क अंतर्गत छल। ओकर बाद ओ बतौर एएसपी, रांची (आब झारखंड) मे सेहो काज केलथि। हुनका पहिल बेर पुलिस अधीक्षक क रूप मे मधुबनी जिला मे तैनात कैल गेल। बाद मे ओ सहरसा मे सेहो पुलिस अधीक्षक रहलाह। ओकर बाद हुनका पटना मे पुलिस अधीक्षक (रेल) बनाउल गेल। एकर बाद श्री सिन्हा विशेष शाखा मे एसपी (सुरक्षा) आ एसपी (ए) क रूप मे काज केलथि।
पुलिस उप महानिरीक्षक क रूप मे प्रोन्नति भेटलाक बाद ओ मगध रेंज (गया) क पुलिस उप महानिरीक्षक बनाउल गेलाह। बाद में वर्ष 1991 मे केन्द्रीय प्रतिनियुक्ति पर गेलाक बाद जखन घुरलाह त ओ बिहार मे कोनो पद पर नहि रहलाह आ बिहार भवन मे आईजी सह विशेष कार्य पदाधिकारी (ओएसडी) क रूप मे दिल्ली मे अपन सेवा दैत रहलाह। किछु दिन पूर्व केन्द्र सरकार श्री सिन्हा कए महानिदेशक क पद पर प्रोन्नति दैत हुनका इंडो-तिब्बत सीमा सुरक्षा बल (आईटीबीपी) क महानिदेशक क पद पर तैनात केने छल।
सीबीआई क निदेशक बनबा स पहिने श्री सिन्हा आईटीबीपी क महानिदेशक क रूप मे काज क रहल छथि। राज्य पुलिस मुख्यालय क आधिकारिक सूत्र कहलक अछि जे श्री सिन्हा बतौर सीबीआई निदेशक कम स कम दू साल काज करताह। इ बिहार लेल पहिल मौका अछि जखन बिहार क दूटा अधिकारी केन्द्र सरकार क महत्वपूर्ण पद पर तैनात अछि। बिहार कैडर क वरिष्ठ आईएएस अधिकारी राजकुमार सिंह फिलहाल गृह मंत्रालय मे सचिव क रूप मे काज क रहल छथि आ आब आईपीएस अधिकारी रंजीत सिन्हा कए सीबीआई क निदेशक क जिम्मेवारी देल गेल अछि।
maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna
jay bihar