दोसरसमाचार
मुंबई। मुख्यमंत्री नीतीश कुमार क मुंबई यात्रा बिहार क विकास लेल मीलक पाथर साबित भेल। देशक औद्योगिक राजधानी मे मुख्यमंत्री नीतीश कुमार देशक शीर्ष उद्योगपति कए कहला जे अगर अहां सब मानि रहल छी जे बिहार बदलल अछि त ओहि ठाम निवेश करू। मात्र हमर प्रशंसा स बिहार क विकास नहि होएत। बिहार मे अपार संभावना अछि आ अहां सब ओकर लाभ लेबा लेल बिहार आउ। एहि पर उद्योग जगत एक सुर मे मुख्यमंत्री कए इ भरोस देलक जे ओ बिहार नवनिर्माण मे हर संभव मदद लेल तैयार अछि। एहि भरोस कए आओर पुख्ता करैत देश क प्रसिद्ध भवन शिल्पी हफीज कॉन्ट्रैक्टर मुख्यमंत्री क सामने बिहार क एकटा नव राजधानी बनेबाक योजना पेश केलथि। सत्रह सौ एकड़ मे प्रस्तावित एहि नूतन राजधानीक नाम ”पाटलिपुत्र” राखल गेल अछि। इ योजना मुख्यमंत्री कए एतबा नीक लागल जे ओ बिहारक नव कार्य संस्कृति कए परिचय दैत हफीज कए तुरंत पटना एबाक न्योत द देलथि। नीतीशक त्वरित कार्रवाई देख हफीज नव राजधानी क योजना कए अंतिम रूप देबा लेल 24 अप्रैल कए पटना पहुंचबाक एलान सेहो क देलथि। एकर अलावा अदानी समूह क अध्यक्ष गौतम अदानी बिहार मे नव ऊर्जा परियोजना लगेबाक एलान केलथि। वेल्सपन समूह सेहो बिहार मे 600 मेगावाट क सौर ऊर्जा परियोजना लगेबाक गप कहलक अछि। जखन कि टाटा मोटर्स अपन सहयोगी संस्था टीसीएस क संग मिल कए चारिटा आइटीआइ संस्थान कए अधिग्रहीत करबाक गप कहलक अछि। एकर संग संग टाटा मोटर्स अंतरराष्ट्रीय स्तर क एकटा ड्राइविंग ट्रेनिंग इंस्टीट्यूट सेहो बिहार मे खोलबाक घोषणा केलक अछि।
एहि स पूर्व होटल ट्राइडेंट मे आयोजित भोज मे करीब तीन घंटे मुख्यमंत्री उद्योग जगत क आला हस्ती सब संग बिहार क विकास लेल चर्चा केलथि। एहि चर्चा मे चोटी क 33टा उद्योगपति आ बैंकर भाग लेलथि। खास गप इ छल जे बैसार मे केवल मंथन नहि भेल। एहि मे किछु उद्योगपति बिहार मे पैघ निवेश क घोषणा सेहो केलथि। उद्योगपति क घोषणा मात्र घोषणा नहि रहि जाए ताहि लेल नीतीश कुमार बिहार फाउंडेशन क मुंबई चैप्टर कए सेतु बनबाक जिम्मेदारी देलथि। आब चैप्टर एहि उद्योग समूह क सीधा संपर्क मे रहत आ हुनका सब कए मुख्यमंत्री कार्यालय स जोड़बा मे भूमिका निभाउत ताकि ओ लालफीताशाही क चक्कर मे न उलझथि।एकर संगहि प्रधानमंत्री कए औद्योगिक विषय मे सलाह देबा लेल जेना चोटी क उद्योगपति क सलाहकार समिति अछि तहिना नीतीश कुमार लेल सेहो शीर्ष उद्योगपति क एकटा सलाहकार समिति बनेबाक निर्णय भेल अछि। एहि समिति क बैसार साल मे दू बेर होएत। एहि समिति क अलावा अंतरराष्ट्रीय स्तर क मैकिंजी आ बोस्टन सन सलाहकार कंपनी क सेहो सरकार सेवा लेत। मुख्यमंत्री बहुत जल्द मुंबई मे उद्योगपति क सम्मेलन करबाक इच्छा प्रकट केलथि अछि। इ सम्मेलन क आयोजन बिहार फाउंडेशन आ सीआइआइ मिलकए करत। एहि सम्मेलन मे उद्योग समूह अपन निवेश योजना क बारे मे बताउत। आजुक बैसार मे वेदांता समूह क अनिल अग्रवाल, बजाज समूह क समीर बजाज, गोयनका समूह क हर्ष गोयनका, आइटीसी क क्रूज ग्रांट, टाटा स्टील क बी मुत्ताूरमण, टाटा मोटर्स क रविकांत, टाटा सन्स क इशाक हुसैन, अदानी समूह क गौतम अदानी, वेल्सपन समूह क वी.के.गोयनका, आइसीआइसीआइ बैंक क अध्यक्ष चंदा कोचर, एक्सिस बैंक क अध्यक्ष शिखा शर्मा आदि शामिल छलथि।
