मुजफ्फरपुर। एकटा जमाना छल जहिया बिहार मे विश्वस्तरीय मकान बनैत छल। भारतक पहिल भूकंपरोधि मकान सेहो 1934 मे बिहार मे बनल छल। बिहार एक बेर फेर विकासक पथ पर अछि आ कानून व्यवस्था ठीक भेला स लोक दिल्ली मुंबई क बदला मे बिहार मे खूब निवेश कए रहल अछि। पिछला 15-20 साल स बिहारक लोक जिनका लग टका छल राज्य स बाहर महल बना रहल छलाह, मुदा आब राज्य स बाहर जेबाक मजबूरी खत्म भ रहल अछि। पटना मे रियल स्टेटक दाम बढल दिल्ली क बिल्डर क माथ पर पसीना आबि गेल, हंगामा भेल जे भ्रष्टाचारक टका नोएडा, गाजीयाबाद क बदला मे पटना मे किया लागि रहल अछि। पिछला साल तक शॉपिंग मॉल विहीन बिहार कए आब अतिआधुनिक बाजारक संग-संग आधुनिक सुख सुविधा स सुसज्जित मकान सेहो देखबा लेल भेट रहल छैक। लीची क लेल मशहूर मुजफ्फरपुर मे बनल रघुवीर सिंह क आलीशान मकान अपना आप मे असगर अछि आ केवल रघुवीर सिंह नहि पूरा शहर क लेल गुमान करबा योग्य अछि। रामदयालु स्टेशन क लग मे बनि रहल इ मकान मे कईटा एहन खास गप अछि जे एकरा बिहारक खास मकान बना दैत अछि। पेशा स वकील रघुवीर सिंह क मकान कए देख पूरा शहर गर्व स गदगद अछि। सिंह आन बिहारी जेकां दिल्ली या मुंबई मे जा बंगला नहि खरीदलाह, ओ अपन डीह पर सपनाक एहन महल बनेलाह अछि जे पूरा शहर कए सपना देखबा लेल मजबूर करि देलक अछि। की नहि अछि एहि मकान मे। अमेरिकी स्टाईल मे बनल इ मकानक सबस पैघ गप इ अछि जे एकर तीनू मंजिल पर अहां कार स पहुंच सकैत छी। हर फ्लोर पर दौड़ैत कार लोक मे रोमांच पैदा करि रहल अछि।
तीन एकड़ मे बनल एहि मकान मे कुल 14टा कोठली अछि। शीशा स बनल सीढ़ी एकरा महल सन सुन्दरता प्रदान करैत अछि। स्विमिंग पुल, जिम, रैम्प, लिफ्ट, एम्पीथियेटर, ऑफिस, मीटिंग रूम, लाईब्रेरी आओर ओ सब किछु जेकर गप त एहि शहरक बहुत लोक सुनने नहि अछि। एकर फुलवारी फूल क महक स पूरा घर जीवंत भ उठैत अछि।
25 साल स अमेरिका मे रहि रहल मूल रूप स पूर्णिया जिला क मुरलीगंज निवासी अजय सिंह आब अमेरिकी नागरिक भ चुकला अछि। एहि मकान क निर्माण क संबंध मे एतबे कहला जे सब किछु रहितो एकटा मन मे दुख छल जे अपन माटी लेल किछु नहि कए सकलहुं। मकान त बस शुरूआत अछि।
अमेरिका मे 5टा रिटेल स्टोर आ सालाना एक हजार मिलियन डॉलर क मालिक 47 वर्षीय अजय सिंह कहला जे ओ सिविल इंजीनियरिंग क पढ़ाई केने छथि। फेर पायलट क ट्रेनिंग लेबा लेल अमेरिका चलि गेलाह आ ओहि ठाम एमबीए केलथि। अपन कारोबार शुरू केलथि आ 25 साल कोनो गुजरि गेल पता नहि चलल। ओ कहला जे बिहार लेल बहुत किछु करबाक अछिए। सबस पहिने हम मुजफ्फरपुर मे एकटा इंजीनियरिंग कॉलेज खोलबा क योजना बना रहल छी। बस एकटा ख्वाहिश अछि जे लीची क लेल प्रसिद्ध मुजफ्फरपुर आब विकसित शहर भ जाए।
