पटना। महानगर बनबा लेल अग्रसर बिहारक राजधानी पटना मे सार्वजनिक यातायात कए आधुनिक आ सुलभ रूप देबाक योजना जमीन पर उतरबा लेल तैयार भ गेल अछि। देश मे मुंबई कए बाद पटना दोसर शहर बनत जाहि ठाम मोनो रेल दौड़त। योजना पर ठीक स काज हुए त 2015 धरि मोनो रेल बनि कए तैयार भ जाएत। बिहार सरकार एकरा लेल अपन सहमति द देने छल, रेलवे सेहो एकरा लेल अपन सहमति प्रदान करि देलक अछि। पटना मे मोनो रेल क निर्माणक जिम्मेदारी रेलवे क इकाई राइट्स टेक्नो इकोनोमिक फिजिबिलिटी स्टडी कए देल गेल अछि।
एहि संबंध मे अधिकारीक कहब अछि जे पटना क सड़क कए आओर बेसी चौड़ा करब संभव नहि अछि, जाहि स यातायातक गंभीर समस्या उत्पन्न भ सकैत अछि। एहन मे मोनो रेल कए पटना मे अनला स काफी हद त समस्या क निदान भ सकैत अछि। पटनाक किछु मुख्य सडक क रोड डिवाइडर पर पिलर बनाकए ओकर उपर मोनो रेल चलाएल जाएत। रेल मंत्रालय एकरा लेल पटना जंक्शन स पटना क मुख्य इलाक कए जोड़िनहार चारि टा सडक पर ट्रैक क निर्माण करबाक योजना कए अंतिम रूप द देलक अछि।
मोनो रेल फिलहाल अमेरिका, जर्मनी, जापान, मलेशिया सन देश मे काफी लोकप्रिय अछि। इ रेल कम लागत, प्रदूषण मु्क्त, हल्का आ तीव्र गति स चलैत अछि। एहि मामला मे पथ निर्माण मंत्री प्रेम कुमार कहला जे पटना क आबादी कए देखैत सरकार मोनो रेल परियोजना पर काम करब शुरु करि देलक अछि। रेलवे क सहमति भेटलाक बाद एकर निर्माण मे जे किछु बाधा छल से आब दूर भ गेल। कुमार कहला जे बिहार सरकार रेलवे स सचिवालय आ दीघा क बीच रेलवेक जमीन कए सडक बनेबा लेल मांगि रहल अछि, ओकर बदला मे सरकार रेलवे कए आन ठाम जमीन देबा लेल तैयार अछि, ओ जमीन भेट गेला स पटना कए एकटा मुख्य सडक भेट जाइत आ बेली रोड आ बोरिंग रोड पर यातायातक दबाव सेहो कम भ जाएत। कुमार कहला जे रेलवे ओहि जमीन कए देबा लेल विचार करि रहल अछि, एखन ओहि जमीन पर बिछल पटरी पर केवल एकटा सबारी गाडी चलैत अछि, जेकर कोनो उपयोगिता नहि अछि आ पटना-हाजीपुर रेल पुल बनलाक बाद इ रेल मार्ग ओनाओ बंद भ जाएत।
ई त नीक गप्प. मोनो रेल और करगर होयत यदि आसपासक इलाका जेना हाजीपूर, दानापुर आदि सेहो के जोरल ज सकय.