पटना। सडक क मामला मे बिहार जेतबा बदनाम छल, आइ अपन सउक पर ओतबे गुमान करि रहल अछि। जाहि रफ्तार स बिहारक सउक पर गाडी दौड रहल अछि ओहि स कनिको कम रफ्तार स सडकक निर्माण नहि भ रहल अछि। ग्रामीण कार्य विभाग एखन रोजाना 30.73 किमी प्रतिदन सडक बना रहल अछि। इ सडक न्यूनतम आवश्यकता कार्यक्रम, नाबार्ड संपोषित, मुख्यमंत्री ग्राम सड़क योजना, अनुसूचित जाति क लेल अंगीभूत योजना, आपकी सरकार आपके द्वार आओर प्रधानमंत्री ग्राम सड़क योजना क तहत बनि रहल अछि। गौरतलब अछि जे विभिन्न योजनाक तहत बनि रहल एहि सडक लेल लक्ष्य केवल 12 किमी प्रतिदिन निर्माणक राखल गेल अछि। यानि लक्ष्य स लगभग दोगुना रफ्तार स बिहार मे ग्रामीण सडकक निर्माण भ रहल अछि। पिछला साल (2009-10)क आंकडा कहैत अछि जे प्रतिदिन नौ किलोमीटर ग्रामीण सडक बिहार मे बनैत छल, जखन कि ताजा आंकडा (अप्रैल स सितम्बर 2011 तक) बता रहल अछि जे बिहार मे प्रतिदिन 21 किमी ग्रामीण सडक बनि रहल अछि। पिछला सालक तुलना मे इ रफ्तार लगभग तिगुना अछि। विभाग क कहब अछि जे ओ एहि वित्तीय वर्ष मे 30 किमी प्रतिदिन निर्माण क रिकार्ड बनेबा लेल तैयार अछि जे राज्य क आधारभूत संरचना विकास क दिशा मे उल्लेखनीय योगदान देत। केन्द्र सरकार क आंकडा पर नजरि दी त साफ अछि जे प्रधानमंत्री ग्राम सड़क योजना क तहत 2006-07 मे प्रतिदिन 4 किमी, 2007-08 मे 5 किमी, 2008-09 मे 8 किमी आओर 2009-10 मे 9 किमी सड़क बनि सकल छल।
केन्द्रीय ग्रामीण विकास मंत्रालय क ताजा आंकडा पर गौर करि त साफ होइत अछि जे राज्य मे 2000-01 आओर 2005-06 यानि पिछला पांच सालक तुलना मे 2006-07 आओर 2009-10, अर्थात मौजूदा तीन साल क बीच 6632टा सड़क बेसी बनल अछि, जेकर कुल लंबाई 26992 किमी अछि। मुदा सडकक मामला मे पछुआयल बिहार लेल इ आंकडा बेहतर स्थिति कहल जा सकैत अछि, मुदा तस्वीर एखनो उत्साहवर्द्धक नहि अछि।
एकर कारण इ अछि जे पिछला तीन साल मे प्रधानमंत्री ग्राम सड़क योजना मे केन्द्र सरकार क रुख उदासीन रहल। कईटा सड़कक चयन करीब ठप रहल आ करीब 9 हजार किमी सड़क क विस्तृत परियोजना प्रतिवेदन केन्द्र क समक्ष लंबित रहल। केन्द्र ग्रामीण कार्य विभाग क कोर नेट वर्क कए सेहो मंजूरी नहि देलक। ओना जयराम रमेश एहि मामला कए गंभीरता स लेलथि अदि आ बहुत रास गतिरोध समाप्त भ गेल अछि, जाहि मे ग्रामीण कार्य विभाग क कोर नेटवर्क कए मंजूरी सेहो शामिल अछि। एखन मे विभागक अधिकारीक कहब अछि जे पिछला आंकडा मे कम रफ्तार लेल कई प्रकारक रुकावट पैघ कारण रहल अछि।
2000-01 स 2005-06 मे 1387 सड़क बनबाक छल, जेकर लंबाई 5202 किमी छल। जखनकि 1613 किमी लंबा केवल 648टा सड़क बनल। 2006- 07 स 2000-10 क बीच 6970 किमी तक 1199 सड़क बनि सकल जखनकि 8019 सड़क बनबाक छल, जेकर लंबाई 320194 किमी होइत छल। प्रधानमंत्री ग्राम सड़क योजना क तहत विभाग 878.25 करोड़ खर्च करैत कुल 562.31 किमी सड़क बनवा सकल अछि।
