नहि चमकि रहल अछि बिहार: राहुल

कांग्रेस क राष्ट्रीय महासचिव राहुल गांधी बिहार मे सत्तासीन राजग पर बिहार शाइनिंग क झूठ प्रचार करबाक आरोप लगौलथि अछि। ओ कहला अछि जे 2004 मे कांग्रेस क खिलाफ राजग चुनाव लड़ने छल ओहि समय मे इंडिया शाइनिंग यानि चमकैत हिंदुस्तान क नारा देने छल, मुदा चुनाव मे देश क जनता बता देलक जे किसान, पिछडा, दलित आ आदिवासी क हिंदुस्तान एखन नहि चमक रहल अछि। गांधी कहलथि जे जखन धरि देश मे एकटा गरीब अछि, देश कोना चमकि चकैत अछि, कांग्रेस हरदम इ बुझैत अछि जे देशक असली चेहरा की अछि आ ओकर हल लेल काज करि रहल अछि।
राहुल गांधी कहलथि अछि जे ओ दिन कोना लौटत जखन एक बेर फेर देश इ देखबाक बाट ताकत जे बिहार आ उत्तर प्रदेश की करि रहल अछि, किया कि बिहार देश कए दिशा दैत रहल अछि। पिछला 25 साल मे बिहार अपन इ रोल नहि निभा रहल अछि। जाति धर्मक आधार पर वोट करबा स बिहार कतहु पाछु छुटि गेल, एहि बेर बिहार लेल वोट करू। कांग्रेस कोनो जाति या धर्मक संग नहि अछि, इ हिंदुस्तान आ बिहारक संग अछि। ओ कहला जे आन दल जाति क नाम पर लोक कए लड़ा रहल अछि, मुदा कांग्रेस एहन काज कहियो नहि केलक आ आगू सेहो केवल विकास क राजनीति करै चाहैत अछि, जाति क नहि।
अहां मे क्षमताक अभाव नहि अछि। अहां सब हिंदुस्तान कए बना देलहुं अछि। बिहार कए सेहो बना सकैत छी, मुदा बिहार मे अहां सब कए जाति आ धर्मक आधार पर बांटि देल गेल अछि। अहां सब कए एकजुट करबाक काज केवल कांग्रेस क सकैत अछि। अहां सब एकजुट होएब तखने बिहारक विकास भ सकैत अछि।
कांग्रेस शासित प्रदेश स बिहारी मजदूर कए खदेड़बा पर राहुल गांधी कहला जे कांग्रेस मानैत अछि जे इ देश सबहक छी, अगर बिहारी नहि होइते त पंजाब विकास क पथ पर नहि दौड़ि सकतए। मुदा जदयू आ शिवसेना मे गठजोड अछि आ मनसे सेहो एहि विचारधारा क पार्टी अछि, ओ नारा देलथि- एक हिन्दुस्तान, सबहक हिन्दुस्तान। कांग्रेस कोनो दू राज्य मे कोनो अंतर नहि मानैत अछि। जहिना बिहारी लेल पंजाब अछि, तहिना पंजाबी लेल बिहार। कियो कतहु रहि सकैत अछि काज कए सकैत अछि।
अहां सबहक मेहनत स आइ देश मे टकाक कोनो कमी नहि अछि, केंद्र बिहार कए टका सेहो द रहल अछि, मुदा ओ टका अहां तक नहि पहुंच रहल अछि। इ गप हमहु बुझैत छी आ नीतीश जी सेहो खूब जनैत छथि।
नीतीश जी कहैत छथि जे बिहार मे विकास भेल अछि। जखन कि हम आ अहां दूनू गोटे जनैत छी जे खेत मे बिजली आ पाइन नहि अछि। हम पूछैत छी जे आखिर बिहार क विकास भ रहल अछि त अहां घर-बार छोड़िकए बाहर किया जा रहल छी? अहांक घरक चूल्हा रोज किया नहि जरैत अछि? इलाका मे बाढ़िक तबाही किया मचल अछि? सब साल केन्द्र सरकार जेे टका दैत अछि ओ कतए खर्च भ रहल अछि?
राहुल गांधी कहला जे केन्द्र मे एनडीए क सरकार छल, तखन बिहार कए पांच साल मे 50 हजार करोड़ टका भेटल। कांग्रेस क सरकार बनला पर इ राशि दोगुना करि देल गेल। मुदा, राज्य सरकार एकरा ठीक ढंग स खर्च नहि केलक। दुख क गप अछि जे अहांक टका अहां तक नहि पहुंच सकल।
ओ कहला जे कांग्रेस विकास क सरकार चलबैत अछि। कईटा कांग्रेस शासित राज्य एकर उदाहरण अछि। ओ कहला जे मनरेगा स इ साबित भेल जे कांग्रेस आम आदमी क सेहो सरकार अछि।
राहुल कहला जे जदयू कहैत अछि जे ओ भाजपाक दू टा नेता कए बिहार नहि टपए देताह। हमर मानब अछि जे इ कोनो दूटा नेताक गप नहि अछि एकर संबंध विचारधारा क स्तर पर अछि। आ हम एहि विचारधारा क खिलाफ छी।
अपन करीब बीस मिनट क भाषण मे राहुल गांधी लोक स कांग्रेस कए फेर स सत्ता मे अनबाक आ जाति आधारित सियासत कए ध्वस्त करबाक गुजारिश केलथि।