पटना । विश्व पर्यटन दिवस क अवसर पर बिहार पर्यटन विभाग पर्यटक कए गुलाब क फूल दकए स्वागत करत। पर्यटन विभाग आओर बिहार राज्य परिवहन विकास निगम जयप्रकाश नारायण अंतरराष्ट्रीय हवाई अड्डा पर आबनिहार यात्री कए स्वागत करत। संग हि गुलाब क फूल सेहो देत। पर्यटन निगम एहि संबंध मे एकटा आदेश सेहो निर्गत करि देलक अछि। पर्यटन होटल मे ठहरनिहार, बस आओर छोट वाहन स यात्रा करनिहार पर्यटक कए निगम क अधिकारी आ कर्मचारी स्वागत करताह। पर्यटन निगम क महाप्रबंधक घनश्याम प्रसाद दतुआर विश्व पर्यटन दिवस क लेल भ रहल तैयारीक रोज समीक्षा क रहल छथि।
दोसर दिस फ्लोटिंग रेस्तरां कए नव कनिया सन सजाउल जा रहल अछि। गंगा क तेज धार मे भ्रमण करनिहार लेल निगम क दिस स डीजे क व्यवस्था कैल गेल अछि। संगहि बच्चा कए मुफ्त मे चाकलेट उपलब्ध करेबाक व्यवस्था कैल गेल अछि। एकर अलावा राजधानी क सबटा प्रमुख होटल सेहो विश्व पर्यटन दिवस पर पर्यटक क स्वागत क तैयारी मे जुटल अछि। भारत पर्यटन एहि वर्ष ग्रामीण विद्यालय मे कार्यक्रम आयोजित करि बच्चा कए पर्यटन स संबंधित जानकारी द रहल अछि।
