दोसरसमाचार
शनिदिन मधुबनी मे बिहारक प्रख्यात चिकित्सक अशोक ठाकुरक हार्ट हास्पीटलक उद्घाटन भेल। गरीब आ पिछड़ल एहि जिला लेल इ एकटा सपनाक पूरा हेबाक समान छल। मुख्यमंत्री नीतीश कुमार अपन हाथ स एहि अस्पताल कए लोकार्पित केलथि। एहि अवसर पर मधुबनीक सांसद हुकुमदेव नारायण यादव सेहो उपस्थित छलाह। मुदा सभा कए संबोधित करबाक मौका भेटल जगन्नाथ मिश्र कए। ज्ञात हुए जे हुकुमदेव क पुत्र अशोक यादव सेहो विधायक छथि आ दूनू गोटे मिल कए जिलाक दू टा चीनी मिल खोलबा लेल जी जान लगौने छथि। ओ चीनी मिल जे पूर्व मुख्यमंत्री आ महान अर्थशास्त्री जगन्नाथ मिश्रक सुयोग्य नेतृत्व मे कंगाल बनि बंद भ गेल। आइ जगन्नाथ मिश्र सक्रिय राजनीति स अलग भ गेल या करि देल गेल छथि। लेकिन ठाकुरजीक ब्राह्मïïणवाद कहि या पिछला कोनो संबंध जे हुकुमदेव क स्थान पर जगन्नाथ मिश्र कए सभा मे बजबाक मौका देल गेल। इ समस्त कार्यक्रम कए एक प्रकार स विवादास्पद बना देलक। आइ पूरा मधुबनी जिला जगन्नथ मिश्रक पिछला साल देल ओ बयान नहि बिसरलक अछि जाहि मे ओ कहने रहथि जे कोसीक बाढ़ स ओ एतबा दुखी छथि जे राजनीति स संन्यास ल ‘बलुआ’ मे रहि लोकक सेवा करय चाहैत छथि। इ बयान झंझारपुरक जनता लेल गारि स कम नहि छल। पिछला 40 साल स बाढ़ झेल रहल झंझारपुरक लेल हुनकर कहियो एहन भावपूर्ण बयान नहि आयल जखनकि एहि ठामक जनताक वोट स ओ बिहारक मुख्यमंत्री बनलाह। आइ धरि झंझारपुर सड़क मार्ग स स्वतंत्र रूप स नहि जुडि़ सकल अछि। रेलवेक भीख पर लोक बस अथवा गाड़ी स झंझारपुर जाइत अछि। इ त राजदक पूर्व सांसद देवेंद्र प्रसाद क प्रयास कहू जे नार्थ-इस्ट कॉरिडोर बरौनी क बदला मे झंझारपुर द कए गेल आ एहि बाट रहित इलाका कए राष्टï्रीय राजमार्ग भेटल। मिथिला मे उद्योग हुए या शिक्षाक स्तर देखल जाए त कोन एहन क्षेत्र अछि जेकर बंटाधार जगन्नाथ मिश्रक कार्यकाल मे नहि भेल। इ अलग गप अछि जे लालू प्रसाद हुनक एहि प्रयास कए आओर आगू बढ़ा अपन चेला धर्मक निर्वाह केलथि। आइ विकासक कोनो मंच पर जगन्नाथ मिश्र कए देखि आयोजनकर्ता स इ पूछबाक इच्छा भ जाइत अछि जे आखिर हुनकर स्मरण शक्ति मात्र 20 सालक किया अछि। ओ किया इ बिसरी जाइत छथि जे मिथिलाक रीढ़ कहल जाइवाला चीनी मिल कोना बंद भेल, ओ कोना बिसरी जाइत छथि जे विश्वविद्यालय मे अराजकता कए अनलक। महात्मा गांधी सेतु आई अपन अंतिम सांस ल रहल अछि। एहि पुलक एहि स्थिति लेल के जिम्मेदार अछि। आइ नीतीश अभियंता स एहि पुल कए बचेबा लेल गुहार लगा रहल छथि, मुदा जगन्नाथ मिश्र स कियो किया नहि पूछबाक हिम्मत जुटा रहल अछि जे एहन कोन चमनागिरी करब जरूरी छल जे पुल तैयार हेबा स पूर्व तत्कालीन प्रधानमंत्री इंदिरा गांधीक हाथ स एकर उद्घाटन करा देल गेल। बिहारक विकास लेल जरूरी अछि जे जगन्नाथ मिश्र क सबटा उपलब्धि कए स्मरण मे राखल जाए किया कि ओ हमरा इ कहैत रहत जे एकटा नेता कोनो बिहारी गौरव कए गारि बना देलक। ताहि लेल जगन्नाथ मिश्र कए मंच पर रहबा स ककरो आपत्ति नहि मुदा जे इलाकाक विकास लेल प्रयास करि रहल अछि ओकर उपेक्षा नहि हेबाक चाही, चाहे ओ कोनो दल, कोनो जाति या कोनो क्षेत्र स हुए । आशा अछि ठाकुर जी अपन एहि गलतीक सुधार करबा लेल प्रयास करताह। ओना अस्पताल खोलबा लेल हुनका कोटि-कोटि धन्यवाद।
