दोसरसमाचार
नई दिल्ली। केंद्र सरकार आखिरकार बिहार सरकारक बहुत पुरान मांग कए पूरा क देलक। भेट रहल जानकारी के अनुसार केंद्र सरकार बिहारक बरौनी ताप संयंत्र क विकास लेल कोल लिंक द देलक अछि। केंद्र सरकार कोल इंडिया कए कहलक अछि जे जाधरि बिहार अपन आवंटित कोल ब्लाक स कोयलाक उत्पादन नहि करैत अछि ता धरि ओ टैपरिंग लिंकेज क तहत बिहार कए कोयला दैत रहए। बिहार कए आवंटित उरमा पहाड़ीटोला मे अगिला साल कोयला क उत्पादन शुरू हेबाक आसार अछि। हालांकि सही रूप मे उत्पादन तीन साल बाद भ सकत।
केंद्र क एहि फैसला स बिहार बिजली क क्षेत्र मे एकटा पैघ बाधा कए पार क लेलक अछि। ओना एहि संयंत्र लेल बिहार कए कोल ब्लॉक आवंटित अछि, मुदा राज्य सरकार कोल ब्लॉक स कोयलाक उत्पादन मे देरी कए देखैत कोल लिंकेज क मांग करैत रहल अछि। उम्मीद कैल जा सकैत अछि जे केंद्र क एहि फैसलाक बाद बरौनी स बिहार कए रोशन करबाक सपना पूरा भ सकत। ओना किछु लोक एकरा राष्ट्रपति चुनाव मे कांग्रेस प्रत्याशी प्रणब मुखर्जी कए देल गेल समर्थन क असर बता रहल अछि। अगर इ सच अछि त राज्यहित लेल पहिल बेर बिहारक कोनो सरकार केंद्र स एहन सौदाबाजी केलक अछि। ओना एहि प्रकारक सौदाबाजी दक्षिण भारत मे होइत रहल अछि। उत्तर भारत लेल इ नव परंपरा कहल जा सकैत अछि। एकटा दैनिक मे छपल समाचारक अनुसार कोयला मंत्री श्रीप्रकाश जायसवाल कोल इंडिया कए निर्देश देलथि अछि जे ओ बरौनी बिजलीघर क विस्तार क्षमता लेल पर्याप्त मात्रा मे कोयला उपलब्ध कराबै। बरौनी मे 250-250 मेगावाट क दूटा नवका इकाइ लगाउल जा रहल अछि। जायसवाल कोल इंडिया कए फिलहाल ‘टैपरिंग लिंकेज’ क जरिए कोयला देबा लेल कहलथि अछि। टैपरिंग लिंकेज ओ व्यवस्था थिक जाहि मे संबंधित परियोजना कए तत्काल कोयला क आपूर्ति कोल इंडिया मौजूदा कोनो खान स करैत अछि। आगू चलि कए बरौनी ताप बिजलीघर कए झारखंड स्थिति उरमा पहाड़ीटोला कोयला ब्लॉक स कोयला देल जाएत। ओना उरमा पहाड़ीटोला कोल ब्लॉक बिहार आ झारखंड क विभिन्न बिजली परियोजना लेल वर्ष 2007 मे आवंटित कैल गेल छल, मुदा एहि ठाम स एहन धरि उत्पादन नहि शुरू भ सकल अछि।
जायसवाल दैनिक कए कहला अछि जे बिहार कए उरमा पहाड़ीटोला कोयला ब्लॉक स 25.7 करोड़ टन कोयला भेटत। राज्य सरकार एहि ब्लाक स सब साल 70 लाख टन कोयला निकाली सकैत अछि। जखनकि बरौनी कए सालाना 23 लाख टन कोयला क आवश्यकता अछि। एहन मे बिहार झारखंड क संग मिलि कए एहि कोयला ब्लॉक कए विकसित करत।
maithili news, mithila news, bihar news, latest bihar news, latest mithila news, latest maithili news, maithili newspaper
