दोसरसमाचार
पटना। बिहार मे उच्च शिक्षा पर काफी बहस भ रहल अछि। केंद्रीय विवि लेल मांग पर मांग उठि रहल अछि, मुदा बिहार मे स्थापित विश्वविद्यालय क हालत इ अछि जे राजभवन सबटा विश्वविद्यालय लेल एकटा कुलपति तक नहि नियुक्त क रहल अछि। बिहार क कईटा विश्वविद्यालय एकटा कुलपतिक बाट ताकि रहल अछि। राज्यपाल क एहि रवैया स विश्वविद्यालय प्रशासन पंगु होइत जा रहल अछि। ओना राजभवन आ सरकार क बीच मतभेद एकर कारण बताउल जा रहल अछि, मुदा दोसर दिस राजभवन क एहि सुस्ती स शिक्षा प्रशासनक क्षेत्र में कईटा रिकार्ड सेहो बनि रहल अछि। एकटा सथानीय दैनिक मे छपल समाचार क अनुसार देश मे बिहार शायद पहिल एहन प्रांत अछि जाहि ठामक तीनटा विश्वविद्यालय क कुलपति पद क जिम्मेदारी एकटा व्यक्ति क हाथ मे अछि। राज्यपाल सह कुलाधिपति क बिहार संग इ व्यवहार कोनो तानाशाही स कम नहि अछि जे ओ प्रो.अरुण कुमार कए एकटा नहि, दूटा नहि बल्कि तीनटा विश्वविद्यालय क एक संग कुलपति बना देने छथि। प्रो.कुमार अगस्त 2010 स बीएन मंडल विश्वविद्यालय (मधेपुरा) क स्थायी कुलपति छथि। राजभवन क कृपा कही या दंड मुदा हुनका मई 2011 स मगध विश्वविद्यालय (बोधगया) आओर जून 2012 स नालंदा खुला विश्वविद्यालय (पटना) क कुलपति पद क सेहो प्रभार सौंप देल गेल अछि। एहन मे जतए एकटा विश्वविद्यालयक प्रबंधन देखब कुलपति लेल मुश्किल होइत अछि ओतहि तीनटा क प्रबंधन एक संग देखब उच्च शिक्षा प्रबंधन क संग मजाक कहल जा सकैत अछि। किया त मधेपुरा स बोधगया क दूरी 299 किलोमीटर अछि जखनकि पटना स बोधगया क दूरी 130 किलोमीटर अछि। एहन मे श्री कुमार की देखताह आ की करताह इ त सब जनैत छी।
दैनिक क अनुसार कुलाधिपति कार्यालय एहि संबंध मे किछु कहबा स मना क रहल अछि। किछु एहने कहब शिक्षा विभाग क सेहो अछि। उच्च शिक्षा क जिम्मेवारी देख रहल नौकरशाह क कहब अछि जे कुलपति क नियुक्ति करब कुलाधिपति कार्यालय क जिम्मेवारी छी। एहि पर कोनो टिप्पणी नहि कैल जा सकैत अछि।
सवाल अछि जे राज्यपालक एहि प्रकारक तानाशाही रवैया स बिहार क उच्च शिक्षा तबाह भ रहल अछि। एक आदमी लग तीन तीन टा विश्वविद्यालयक जिम्मेदारी देला स ओ कोनो विश्वविद्यालय कए सही प्रकार स प्रशासनिक कार्य लेल समय नहि द पाबि रहल अछि। बिहार मे मजाक बनि चुकल कुलपति पद स सबस बेसी समस्या जरूरतमंद छात्र, शिक्षक आओर कर्मचारी कए भ रहल अछि जेकरा कुलपति सन लोक स भेंट त दूर दर्शन तक नहि भ पाबि रहल अछि।
दैनिक दावा केलक अछि जे जरूरतमंद विद्यार्थी क अति आवश्यक ‘डिग्री’ आ संचिका पर हस्ताक्षर लेल मगध विवि स विशेष दूत संचिका ल कए राजधानी पटना स्थित प्रो.कुमार क आवास पर जाइत अछि। इ ओ जरूरतमंद छथि जिनका नौकरी स ‘काल लेटर’ अबैत अछि आ फेर डिग्री लेल भागल-भागल विश्वविद्यालय मुख्यालय मे पहुंचैत छथि मुदा कुलपति नहि रहला स हस्ताक्षर नहि भ पबैत अछि। ओना प्रो.कुमार क कहब छैन जे ओ तीनू ठाम प्रयाप्त समय दैत छथि। सवाल उठैत अछि अगर ओ सब ठाम प्रयाप्त समय दैत छथि, एकर मतलब इ त नहि जे हुनका दू-चारिटा आओर विश्वविद्यालयक प्रभार द देल जाए। ओना हुनक कार्यकाल समीक्षा त बाद मे कैल जाएत, मुदा राजभवन जेना विश्वविद्यालय कए पंगु बनेबाक प्रयास मे अछि ओ काफी गंभीर मामला अछि।
maithili news, mithila news, bihar news, latest bihar news, latest mithila news, latest maithili news, maithili newspaper
Students should revolt as it impacts them and we all should support. Why such a governor, who is ante Bihar, still there. Can we all work to get rid of him?