दोसरसमाचार
पटना : उत्तर बिहार मे बाढ़ स भ रहल तबाही पर नियंत्रण आ पाइन क उपयोग सिंचाई लेल बूढ़ी गंडक-नोन-बाया-गंगा लिंक योजना क विस्तृत परियोजना प्रतिवेदन (डीपीआर) स्वीकृति लेल केंद्रीय जल आयोग क सुपुर्द क देल गेल अछि। योजना कए तेरहम वित्त आयोग मे वित्तीय सहायता लेल शामिल क लेल गेल अछि। डीपीआर, नेशनल वाटर डेवलपमेंट एजेंसी तैयार केलक अछि। केंद्रीय जल आयोग क स्वीकृति क बाद प्रस्ताव योजना आयोग कए पढाउल जाएत। ओकर स्तर स जांचोपरांत स्वीकृति क बाद कार्य प्रारंभ भ जाएत । योजना लागू भेला पर पर 4214 करोड़ व्यय अनुमानित अछि। एकर तहत 71 किलोमीटर लंबाई मे चैनल निर्माण होएत। चैनल क माध्यम स बाढिक दौरान बूढ़ी गंडक नदी क 492 क्यूसेक पाइन नोन आ बाया नदी होइत गंगा नदी मे जाएत। नेपाल स आयल नदी मे मानसून क शुरुआत मे बाढ़ आबि जाइत अछि। एहि अवधि मे गंगा नदी क जलस्तर काफी नीचे रहैत अछि। एहन स्थिति मे बूढ़ी गंडक नदी क जलस्तर बेसी रहबा पर पाइन गंगा मे देल जा सकैत अछि। एहि स बूढ़ी गंडक क प्रवाह कम होएत आ बाढि स भ रहल तबाही कए नियंत्रित कैल जा सकत। योजना क मूर्त रूप देबा पर बेगूसराय, समस्तीपुर आ खगड़िया जिला क 1 लाख 26 हजार हेक्टेयर मे सिंचाई भ सकत। एहि स गरमा क खेती कए बढ़ावा भेटत। जल संसाधन मंत्री विजय कुमार चौधरी क कहब अछि जे राज्य क नदी सब कए एक दोसर स जोडबा क देशभरि मे इ पहिल योजना होएत। एहि सअतिरिक्त सिंचाई क्षमता सृजित कैल जा सकत संगहि बाढि नियंत्रित सेहो भ सकत। नदी जोड़ योजना क स्थिति: कोहरा -चंद्रावत लिंक : प्री फीजिवलिटी रिपोर्ट तैयारी क प्रक्रिया मे । प्रस्तावित लागत 168.89 करोड़। पश्चिम आ पूर्वी चंपारण जिला कए भेटत लाभ। बागमती-बूढ़ी गंडक वाया बेलवाधार : पीपीआर तैयार । लागत 125.96 करोड़। शिवहर,सीतामढ़ी आ मुजफ्फरपुर जिला कए भेटत लाभ। कोसी-गंगा लिंक : चैनल निर्माण 10 किलोमीटर , लागत 88.93 करोड़, पीपीआर क तैयारी। खगड़िया,भागलपुर जिला कए भेटत लाभ। कोसी बेसीन क पानी कोसी-मेची लिंक केनाल क माध्यम स महानंदा बेसीन मे ट्रांसफर । लागत 88.93 करोड़। पीपीआर क तैयारी। चैनल निर्माण 120.15 किलोमीटर। लाभान्वित जिला सुपौल, सहरसा, अररिया, किशनगंज आ पूर्णिया।
इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, Hawai seva, latest bihar news, latest maithili news, latest mithila news, maithili news, maithili newspaper, mithila news, patna, saharsa
