दोसरसमाचार
डीएम क एनओसी भेटला पर होएत तिथिक घोषणा
मुख्यमंत्री विमान रखबा लेल देलथि स्टेट हैंगर
पूरा होएत भाजपा सांसद शाहनवाज क सपना
भागलपुर: भागलपुर स हवाई सेवा शुरू करबाक भाजपा सांसद शाहनवाजक सपना आखिरकार पूरा भ गेल। मुख्यमंत्री नीतीश कुमार ऐतिहासिक फैसला लैत पटना एयरपोर्ट पर पहिल बेर स्टेट हैंगर मे कोनो निजी कंपनी कए विमान रखबा लेल जगह देबाक प्रस्ताव कए मंजूरी प्रदान क देलथि अछि। पटना-भागलपुर हवाई सेवा लेल इ मंजूरी जरूरी छल। मुख्यमंत्री क मंजूरी भेटला स उत्साहित स्काई फिशर एयरवेज लिमिटेड घोषणा केलक अछि जे ओकर पहिल उड़ान पटना आ भागलपुर क बीच होएत। ओना इ तखने संभव होएत जखन भागलपुर रनवे पर सेटअप तैयार रहत आ टेक ओवर आ लैंडिंग लेल भागलपुर जिला प्रशासन एनओसी देत। कंपनी कए उम्मीद अछि जे एनओसी भेटबा मे आब कोनो दिक्कत नहि हेबाक चाही, किया त पटना एयरपोर्ट पर पार्किग लेल मुख्यमंत्री स अनुमति भेटलाक बाद जिला प्रशासन सेहो सहयोग करबा लेल आगू आउत। एहि स पहिने वाराणसी मे पार्किग क अनुमति भेटल छल, मुदा ओहि ठाम ठहराव स भागलपुर स सेवा शुरू नहि कैल जा सकैत छल। कंपनी क कहब अछि जे भागलपुर मे सेटअप तैयार करबा मे आ एनओसी लेबा मे एक माह तक समय लागत त कंपनी सेवा शुरू करत नहि त कंपनी आब बेसी घाटा नहि उठा सकैत अछि। ज्ञात हुए जे कंपनी क जहाज एखन सिंगापुर मे राखल अछि जेकर किराया कंपनी कए रोजना चुकेबा पडि रहल अछि। एहन में कंपनी पटना, गया आ वाराणसी क बीच हवाई सेवा शुरू क देत। कंपनी कहब अछि जे हवाई सेवा शुरू करबा लेल राज्य प्राधिकारी स अनुमति प्राप्त कैल जा चुकल अछि। पटना स भागलपुर लेल प्रस्तावित हवाई सेवा कए शुरू करबा लेल सेहो मंजूरी द देल गेल अछि। कंपनी क कहब अछि जे राज्य स्तर पर जे एकटा बाधक छल सेहो खत्म भ गेल अछि मुख्यमंत्री कार्यालय स अंतिम फैसला क रूप मे निर्णय कंपनी क पक्ष मे आबि गेल अछि।
इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, Hawai seva, latest bihar news, latest maithili news, latest mithila news, maithili news, maithili newspaper, mithila news, patna, saharsa
