दोसरसमाचार
नई दिल्ली। दरभंगाक सांसद त नहि मुदा पूर्णिया क सांसद जरूर अपन क्षेत्र स हवाई सेवा शुरू करेबा लेल सक्रिय भ गेलाह अछि। पूर्णिया क चूनापुर सैन्य हवाई अड्डा स नागरिक विमानन सेवा शीघ्र करबाक प्रयास मे लागल पूर्णिया क सांसद उदय सिंह उर्फ पप्पू सिंह कहला अछि जे ओ एकरा अपन प्राथमिकता सूची मे स्थान देने छथि। एहि संबंध मे ओ एखन धरि केन्द्रीय नागरिक उड्डयन मंत्री अजीत सिंह आ रक्षा मंत्री एके एंटनी स भेंट क चुकला अछि आ आगू सेहो करैत रहताह।
ज्ञात हुए जे दरभंगा आ पूर्णिया स नागरिक हवाई सेवा शुरू करबाक इ’समाद क मुहिम क बाद मुख्यमंत्री नीतीश कुमार तक एकर समर्थन करैत कहला अछि जे दूनू ठाम स सेवा अतिशीघ्र शुरू कैल जाए। पूर्णिया क सांसद श्री सिंह सेहो एहि मुहिम कए देखैत पिछला मास चूनापुर सैन्य हवाई अड्डा क विंग कमांडर विश्वजीत कुमार स नागरिक विमानन सेवा स संबंधित वस्तु स्थिति क जानकारी लेने छलाह। सांसद क कहब अछि जे पूर्णिया स विमान सेवा शुरू करबाक लेल सबटा आधारभूत संरचना एहि ठाम मौजूद अछि, केवल तकनीकी स्वीकृति क जरूरत अछि जे केंद्र देबा मे आनाकानि क रहल अछि। ओना ओ कहला जे ओ दूनू केंद्रीय मंत्री स एहि संबंध मे गुहार लगा चुकल छथि आ दूनू मंत्री हुनका आश्वस्थ केलथि अछि जे विमानन सेवा मे आबि रहल बाधा कए शीघ्र दूर करेबाक प्रयास कैल जाएत। सांसद श्री सिंह कहला जे पूर्णिया मे विमान सेवा शुरू भेला स एहि ठामक लोक कए चिर-प्रतीक्षित मांग पूरा भ जाएत आ एहि स कोसी क्षेत्र मे तेजी स विकास होएत। ओ कहला जे हवाई सेवा शुरू भेला स केवल पूर्णिया क नहि बल्कि किशनगंज तक क चतुर्दिक विकास संभव भ सकत।
सांसद श्री सिंह कहला अछि जे ओ एहि लेल सब स्तर पर प्रयास क रहल छथि ओ पूर्णिया स विमान सेवा शुरू करबाक केंद्र स अनुमति भेटलाक बाद क स्थिति लेल सेहो तैयारी शुरू क देलथि अछि। श्री सिंह कहला जे ओ एहि सिलसिला मे कईटा निजी एयरलाइंस कंपनी स सेहो एहि संबंध मे गप केलथि अछि। कंपनी क प्रदाता सब सेहो पूर्णिया स अपन वायु सेवा शुरू करबा क आश्वासन देलक अछि। सांसद श्री सिंह कहला जे आब केंद्र लेल एहि सेवा कए रोकब कठिन अछि, हां किछु देरी क सकैत अछि, मुदा आब ओ दिन दूर नहि जखन पूर्णिया स वायु सेवा शुरू करि देल जाएत।
श्री सिंह कहला जे चूनापूर सैन्य हवाई अड्डा पूर्णिया स नागरिक विमान सेवा शुरू करबा लेल एहि लेल आसान अछि किया त एहि ठाम केवल एकटा नागरिक टर्मिनल बनेबाक जरूरत अछि। हवाई जहाज क उड़बा लेल आ लैंड करबा लेल वायु सेना बेस क उपयोग कैल जाएत। ज्ञात हुए जे चूनापुर एयरफोर्स स्टेशन देश क महत्वपूर्ण अजीवंत हवाई अड्डा मे स एक अछि। कुल मिला कए इ कहल जा सकैत अछि जे पूर्णिया क सांसद जाहि प्रकार स एहि मसला पर सक्रियता देखा रहल छथि एखन मे इ संभव अछि जे उत्तर बिहार मे स्थित दरभंगा आ पूर्णिया मे स केंद्र सरकार पूर्णिया एयरबेस कए एयरपोर्ट बनेबाक मंजूरी प्रदान करै आ दरभंगा कए नजरअंदाज करबाक कोशिश करै। किया त एक दिस जतए पूर्णिया क सांसद सक्रिय छथि आ एएमयू क शाखा किशनगंज मे खुलबा स पूर्णिया क दावा मजबूत भ गेल अछि, ओतहि दरभंगा क सांसद क उदासीनता आ दरभंगा क दिस कोनो पैघ केंद्रीय संस्थान या कारखाना नहि खुलबा स एकर दावा नित्य कमजोर भ रहल अछि।
maithili news, mithila news, bihar news, latest bihar news, latest mithila news, latest maithili news, maithili newspaper
Purnea sa havaai seva suru bhene kam sa kam Mithilak ek ta shahar ta hawai maanchitra me abiye jayat. Darbhanga sa seho shuru hue ta aar uttam.