दोसरसमाचार
दिल्ली आखिरकार बिहार कए पछुआ देलक। अपहरण क मामला मे दिल्ली बिहार स आगू भ गेल। दिल्ली इ रिकार्ड बिहार स झकटि लेलक अछि। नेशनल क्राइम रिकार्ड ब्यूरो क ताजा आंकडा मे इ खुलासा कैल गेल अछि। पूरा देशक अपराध क आंकडा देखला पर स्पष्ट भ जाइत अछि जे पिछला तीन साल मे दिल्ली अपहरण क राजधानी बनि चुकल अछि, जखन कि बिहार एहि मामला मे लगातार पछुआ रहल अछि। रिपोर्ट क अनुसार 2011 मे देश मे कुल 4044 गोटे क अपहरण भेल जाहि मे असगर दिल्ली मे 2670 गोटेक अपहरण कैल गेल। कुल अपहरणक मामला वर्ष 2010 स बेसी अछि कि त 2010 मे कुल अपहरणक ममाला मात्र 3565 छल, जे 2011 मे 4044 भ गेल। मुदा दिल्ली क आंकडा मे गजब क उछाल अछि। दिल्ली मे खास क नाबालिक बच्चा आ किशोर क अपहरण देशक आन राज्य स कई गुना बेसी भेल अछि।
रिपोर्ट अनुसार 15 साल तक क किशोर क अपहरणक मामला मे दिल्ली आब बिहार स आगू भ गेल अछि। 2009 मे जतए दिल्ली मे 1447टा बच्चाक अपहरण भेल छल ओतहि 2011 मे एक स 15 साल तक क बच्चा क अपहरण क 2242 टा मामला दर्ज भेल। 2010 मे इ आंकडा 2014 छल। 2011 मे दोसर स्थान पर 782 मामलाक संग उत्तर प्रदेश रहल जे दिल्ली क आंकडा स काफी कम अछि। बिहार त एहि कतार मे आठम स्थान पर रहल। बिहार मे एहन 184टा मामला दर्ज भेल। एहिना 2011 मे 15 स 18 वर्ष क किशोर क अपहरण क दिल्ली मे कुल 431टा मामला दर्ज भेल जे कोनो राज्य लेल सबस बेसी अछि। एहि मामला मे बिहार दोसर स्थान पर रहल आ ओहि ठाम मात्र 133टा मामला दर्ज भेल। एहि आयुवर्ग मे सेहो दिल्ली बिहार से बहुत आगू भ गेल अछि। गौरतलब अछि जे आन राज्य स अलग दिल्ली मे एहन घटना कए रोकबा लेल विशेष व्यवस्था कैल गेल अछि। स्थानीय पुलिस क अलावा क्राइम ब्रांच सेहो एहन मामला क देखरेख करैत अछि। एकर बावजूद दिल्ली स लगातार बच्चा आ किशोर गायब भ रहल अछि। एक दिस एनजीओ एहि अपहरण सब कए मावन तस्करी स जोडबाक प्रयास मे छथि त दोसर दिस दिल्ली पुलिस क दावा अछि जे दिल्ली मे भ रहल अपहरण बिहार जेकां फिरौती लेल नहि भ रहल अछि। ओना दूनू दावा कए स्वीकार करब जानकार लेल कठिन अछि। हुनक कहब अछि जे अपहरण कोनो कारण स भ रहल अछि त ओकरा वैध नहि कहल जा सकैत अछि। कईटा जांच मे पता चलल जे दिल्ली मे अपहरण क बाद बरामद बच्चा क मामला क फाइल बरामदगीक बाद बंद करि देल गेल। पुलिस जबरन बच्चाक परिजन स मामला बंद करबा लेल शपथपत्र ल लैत अछि। एहन मे इ बुझब कठिन भ जाइत अछि जे अपहरण किया भेल छल आ बरामदगी कोना भेल। दिल्ली पुलिसक रिकार्ड बता रहल अछि जे बच्चा बरामदगी क बाद कोनो मामला पर अनुसंधान जारी नहीं राखल गेल। एहन मे दिल्ली पुलिसक इ दावा मे कोनो दम नहि बुझाइत अछि जे दिल्ली मे अपहरण फिरौती लेल नहि भ रहल अछि। दोसर दिस निठारी क बाद दिल्ली मे बच्चा क सुरक्षित घर वापसी एकटा चिंताक कारण त बनि चुकल अछि। किछु हालक वर्ष मे मानव तस्करी क मामला सेहो बढल अछि ताहि मे बच्चा तस्करीक आंकडा सबस बेसी अछि। खास क दिल्ली स युवती जेना गायब भ रहल छथि ओ चिंताक सबस पैघ कारण बनल जा रहल अछि। एहन मे एनजीओ क इ दावा मे सेहो दम लगैत अछि जे इ अपहरण मानव तस्करी क हिस्सा अछि। कारण जे हो, मुदा एतबा स सच अछि जे दिल्ली मे कहांक कखन, कतए आओर कोना अपहरण भ जाएत इ कियो नहि जनैत अछि। दिल्ली स सब दिन 10टा बच्चा गायब भ रहल अछि, मुदा सरकार लेल इ चिंताक विषय नहि अछि।
maithili news, mithila news, bihar news, latest bihar news, latest mithila news, latest maithili news, maithili newspaper
