दोसरसमाचार
दुर्गा पूजा क बाद होएत शिलान्यास, सरकार देलक जमीन
भागलपुर : आब भागलपुर मे मेगा फूड पार्क नहि बनत। लाख प्रयासक बावजूद एहि जिला मे जमीन नहि भेट सकल। मेगा फूड पार्क आब बांका क बौंसी मे बनत। एक हजार करोड़ क एहि परियोजना मे लेल बिहार सरकार बौंसी मे स्थित बियाडा क 101 एकड़ जमीन द देलक अछि। एहि परियोजना क तीनू पार्टनर केंवेटर एग्रो, शक्ति सुधा आ बिग बाजार पैंटालून क एमडी पटना मे औद्योगिक विकास आयुक्त संग बैसार मे इ फैसला लेलथि। आब 18 सितंबर कए दिल्ली मे खाद्य प्रसंस्करण विभाग संग बैसार मे योजना पर अंतिम गुहर लागत।
शक्ति सुधा क एमडी आ पीएचडी चैंबर आॅफ कॉमर्स क अध्यक्ष आ सीआइआइ क बिहार सर्किल क पूर्व चेयरमैन सत्यजीत सिंह कहला अछि जे दुर्गा पूजा क लगाइत एकर शिलान्यास आ भूमि पूजन होएत। 11 मास मे प्रोजेक्ट पूरा होएत। ओ कहला जे अगर बिहार सरकार समय पर बौंसी क जमीन उपलब्ध नहि करा सकिते त इ परियोजना आन राज्य जा सकैत छल। सिंह कहला जे बिहार सरकार भागलपुर लेल एहि प्रोजेक्ट पर छह मास आर समय चाहैत छल, मुदा केंद्र सरकार एकरा लेल तैयार नहि छल। ओ कहला जे एहि प्रोजेक्ट मे बिहार सरकार सेहो एकटा पार्टी अछि। लिहाजा ओकर संग चलब जरूरी छल। ईंस्टर्न बिहार इंडस्ट्रीज एसोसिएशन क अध्यक्ष मुकुटधारी अग्रवाल कहला अछि जे आब प्रोजेक्ट कए बौंसी मे कोनो तरहक विरोध नहि हुए तेकर गारंटी सरकार कए लेबाक चाही।इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, Hawai seva, latest bihar news, latest maithili news, latest mithila news, maithili news, maithili newspaper, mithila news, patna, saharsa
