दरभंगा । मिथिला स हवाई सेवा शुरु करबाक मुहिम आखिरकार रंग पकडी लेलक। बेंगलुरु क निजी विमानन कंपनी स्प्रीट एयरवेज दरभंगा स सेवा शुरु करबा लेल तैयार भ गेल अछि। सोशल मीडिया पर पिछला छह माह स मुहिम चलेनिहार दरभंगा रॉक्स क एडमिन अनुभव सिन्हा आ कंपनी क बीच भेल बैसार मे इ तय भेल जे दरभंगा आ दिल्ली क बीच अनियमित विमान सेवा शीघ्र शुरु होएत। एहि लेल कंपनी डीटीडीएस कए बुकिंग आ परिचालनक जिम्मेदारी सौंपलक अछि। डीटीडीएस क कहब अछि जे नेपाल में आयल भूकंप क कारण तिथि आ किराया निर्धारण मे देर भ रहल अछि। बहुत जल्द तिथि आ किराया क घोषणा कैल जाएत।
उल्लेखनीय अछि जे दरभंगा स विमान सेवा शुरु करबा लेल चारुकात स लोग आवाज उठा देने अछि। दिल्ली मे एहि मुहिम कए पत्रकार सुशांत झा चला रखने छथि। श्री झा पहिने त लोक कए दरभंगा स विमान सेवा शुरु करबा लेल लामबंद केलथि, तदुपरांत ओ दिल्ली आ दरभंगा क बीच केतबा किराया हेबाक चाही ताकि पर सेहो एकटा विस्तार स सर्वे केलथि। दिल्ली क मुकेश झा आ पटना क विजय झा सेहो एहि मुहिम कए अपना अपना स्तर स आगू बढेलथि अछि।
जखन एतबा आ एहन स्तर पर जन कोनो मुहिम चलाउत त जनप्रतिनिधि कोना शांत बैस सकैत छथि। दरभंगा क सांसद कीर्ति आजाद पहिने तक नागरिक उड्डयन मंत्री कए पत्र लिखलथि आ बाद मे संसद मे सवाल आ मांग सेहो केलथि। झंझारपुरक सांसद वीरेंद्र चौधरी त बेजाप्ता सरकार स एहि संबंध में विस्तार स सवाल केलथि। केंद्र क मसला हेबाक बावजूद विधानसभा मे सेहो एकरा लेल मांग भेल। दरभंगाक नगर विधायक संजय सरावगी सरकार स दरभंगा स हवाई सेवा शुरु करबा लेल केंद्र स अनुरोध करबाक संकल्प रखलथि। विधान परिषद मे कांग्रेस क मदन मोहन झा सेहो दरभंगा स हवाई सेवा शुरु करबा लेल ध्यानाकर्षण देलथि।
अंतत: दरभंगा स नागरिक उड्डयन सेवा के लिए नागरिक उड्डयन मंत्रालय सक्रिय भेल आ बैसार केलक। नागरिक उड्डयन मंत्री मनोज गजपति राजू आ पर्यटन मंत्री महेश शर्मा दिल्ली मे नागरिक उड्डयन अधिकारी क संग एकटा संयुक्त बैसार केलथि। इ बैसार संसद भवन मे भेल। बैसार मे एहि गप पर सहमति बनल जे दरभंगा स विमान सेवा शुरु कैल जा सकैत अछि। विजयवाडा क राजकुमार आ केंद्रीय उड्डयन मंत्री अशोक गजपति राजू दरभंगा स पूर्वहि परिचित छथि। ताहि लेल ओ अपनहु स संबंधित अधिकारी कए दरभंगा मे हवाई यातायात क व्यावहारिक पक्ष स अवगत करेबाक काज केलथि। ओ कहला जे दरभंगा महाराजा क समय स दरभंगा मे हवाई यातायात क सुविधा छल आ वर्तमान मे दरभंगा हवाई अड्डा बिहार क सबस पैघ हवाई अड्डा अछि। पर्यटन मंत्री महेश शर्मा कहला जे व्यावसायिक आ सांस्कृतिक विकास लेल इ अत्यंत आवश्यक अछि जे दरभंगा मे हवाई यातायात क सुविधा कए जल्द स जल्द बहाल कैल जाये। नागरिक उड्डयन मंत्रालय एकरा लेल जल्द स जल्द सर्वेक्षण रिपोर्ट जमा करबा लेल अधिकारी सब कए निर्देश देलक अछि। उम्मीद कैल जाय जे रिपोर्ट एलाक बाद सरकार दरभंगा स सेवा शुरु करबाक घोषणा करत।
इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, latest bihar news, latest maithili news, latest mithila news, maithili news, maithili newspaper, mithila news, patna, saharsa
दोसरसमाचार
