महिला दिवस पर विशेष : महिला कए स्वरोजगार आ स्वाबलंबन बनेबा लेल 1962 मे भेल छल स्थापना
दरभंगा । महिला दिवस पर सब ठाम आइ एक सुर स महिला कए स्वरोजगार आ स्वाबलंबन बनेबा लेल अपील कैल जा रहल अछि। मुदा वर्ष अपील महज मंच स ताली सुनबा लेल कैल जाइत रहल अछि। किया त सच किछु आओर अछि। महिला कए स्वरोजगार आ स्वाबलंबन बनेबा लेल खुलल संस्थान क प्रति लोक आ सरकारक नजरि उपेक्षा स भरल रहल अछि। 1962 मे मैट्रिक पास युवती कए स्वरोजगार आ स्वाबलंबन बनेबा लेल प्रशिक्षित करबा क महत्वाकांक्षी योजना क तहत राज्य सरकार क विज्ञान आ प्रावैधिकी विभाग दरभंगा मे एकटा राजकीय महिला औद्योगिक विद्यालय स्थापित केने छल। आइ स्थिति इ अछि जे एहि संबंध मे बहुत कम लोक लग जानकारी अछि । कादिराबाद स्थित पॉलिटेक्निक कॉलेज परिसर मे स्थित इ राजकीय महिला औद्योगिक विद्यालय 1962 स चलि रहल अछि, मुदा लगभग एक दशक स मृतप्राय भ चुकल अछि । एहि संस्थान मे विगत सत्र स कोनो नामांकन नहि भेल अछि। प्रधानाध्यापक आ शिक्षिका क सबटा पद कई साल स रिक्त अछि। एकर बंगलानुमा भवन कए पोलिटेक्निक क कर्मचारी अपना रहबा लेल उपयोग करैत छथि। वर्तमान मे एहि ठाम एकटा अंशकालीन लिपिक आ एकटा गार्ड कार्यरत छथि, मुदा हिनकर दुर्दशा इ अछि जे संस्थान क एकटा बोर्ड तक अस्तित्व मे नहि बचा सकलाह।
तत्कालीन राज्यसभा सांसद डा कामेश्वर सिंह क सहयोग स पहिने इ पुरान बस स्टैंड क निकट स्थित राज पॉलिटेक्निक कॉलेज क कैंपस मे खोलल गेल छल। वर्ष 1968 मे एकरा नव पॉलिटेक्निक कॉलेज परिसर मे शिफ्ट कैल गेल।
एहि ठाम छात्रा कए सिलाई-कटाई, खिलौना आ गुड़िया निर्माण, काशीदाकारी आदि स संबंधित चारिटा कोर्स मे एक वर्षीय सर्टिफिकेट कोर्स क प्रशिक्षण देल जाइत छल। एहि ठाम सिलाई आ कटाई पाठ्यक्रम मे 25टा छात्रा कए आ हाथ काशीदा आ मशीन कशीदा, हाथ बुनाई आ मशीन बुनाई आओर खिलौना आ गुड़िया निर्माण पाठ्यक्रम मे 10-10टा छात्रा क नामांकन लेल जाइत छल। पहिने इ संस्थान राज्य सरकार क योजना अंतर्गत संचालित कैल जाइत छल, जेकरा एक मार्च 1998 कए नियमित क देल गेल।
एहि ठाम शिक्षक आ शिक्षकेत्तर कर्मचारी क सातटा पद स्वीकृत अछि। एहि मे स एकटा प्रधानाध्यापिका, एक वरीय अध्यापिका, दूटा कनीय अध्यापिका, एकटा दाई, एकटा दरबान आ एकटा अंशकालीन लिपिक शामिल अछि, मुदा वर्ष 2000 स स्थानांतरित भ गेला पर एहि ठाम शिक्षिका क सबटा पद रिक्त अछि।
दोसरसमाचार
वर्ष 2000 से मात्र एकटा कनीय अध्यापिका क सहारे लचर ढ़ंग स प्रशिक्षण कार्य चलैत रहल। वर्ष 2011 मे हुनको बदली क देल गेल जेकर बाद छात्रा एहि ठाम नामांकन लेबा स परहेज क लेलथि। सत्र 2003-04 आ 2004-05 मे एहि ठाम कोनो नामांकन नहि भेल। सत्र 2005-06 मे सबटा पाठ्यक्रम मिला कए मात्र 10टा, सत्र 2006-07 मे मात्र 13टा, सत्र 2007-08 मे 5टा आ सत्र 2008-09 मे 14टा नामांकन भेल। सत्र 2009-10 स नामांकन नहि भ रहल अछि।
वर्तमान मे एहि ठाम एकटा अंशकालीन लिपिक आ एकटा गार्ड कार्यरत छथि, मुदा संस्थान क बोर्ड तक लापता भ चुकल अछि। संस्थान क प्रभारी, विज्ञान आ प्रावैधिकी विभाग क निकासी आ व्ययन पदाधिकारी रेवती रमण झा संस्थान क एहि हालत पर कहैत छथि जे राज्य क सबटा महिला औद्योगिक विद्यालय जेकां इ सेहो शिक्षिका क अभाव झेल रहल अछि। छात्रा नामांकन नहि करा रहल छथि। शिक्षिका क नव नियुक्ति होएत तखने हालात मे बदलाव आबि सकैत अछि।
maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna, दरभंगा, मिथिला, मिथिला समाचार, मैथिली समाचार, बिहार, मिथिला समाद, इ-समाद, इपेपर
