दोसरसमाचार
पटना : देश-दुनिया क बाजार मे मंदी क असर क बावजूद बिहार मे राजस्व वसूली क स्थिति ठीकठाक अछि। बल्कि सुधरि रहल अछि। राजस्व वसूली क हिसाब स राज्यक चारिटा विभाग लक्ष्य स आगू जा चुकल अछि। मुख्य सचिव एके सिन्हा एहि संबंध मे जानकारी दैत कहला जे वाणिज्य-कर लग एहि साल जुलाई मास तक 3033 करोड़ वसूली क लक्ष्य छल। जेकर विरुद्ध विभाग जुलाई तक 3140 करोड़ टका क वसूली क चुकल अछि। एहि साल वसूली क लक्ष्य कए 13643 करोड़ स बढ़ा कए 16275 करोड़ कैल जा रहल अछि। एहिना खान विभाग त जुलाई तक वसूली लक्ष्य क विरुद्ध 224 फीसद तक वसूली लेलक अछि। खान विभाग क एहि वर्ष 641 करोड़ राजस्व संग्रहण क लक्ष्य छल। जुलाई तक 80 करोड़ क लक्ष्य क विरुद्ध 179.83 करोड़ क संग्रहण कैल गेल अछि। निबंधन विभाग जुलाई तक 825 करोड़ क लक्ष्य क विरुद्ध 935 करोड़ क वसूली केलक अछि, जे लक्ष्य क 113 फीसदी अछि। एहन मे राजस्व वसूली क बेहतर स्थिति कए देखैत तीनटा विभाग कए 3 हजार करोड़ आओर वसूलबा क नव लक्ष्य सौंपल गेल अछि। मुख्य सचिव कहला जे वाणिज्य कर विभाग कए 2672 करोड़ आ निबंधन कए 272 करोड़ आ परिवहन विभाग कए 100 करोड़ आओर वसूलबाक टास्क सौंपल गेल अछि।
मुख्य सचिव राजस्व देनिहार चारिटा पैघ विभाग वाणिज्य-कर, निबंधन, उत्पाद एवं खान विभाग क अधिकारी संग कर वसूली पर मंथन केलथि। बैसार क बाद ओ कहला जे दू-तीन मास क भीतर सरकार सबटा चेक-पोस्ट पर धर्मकांटा लगा देत। एहि स ओवरलोडिंग रुकत। वाणिज्य-कर विभाग कए विशेष फायदा होएत। एकर असर राज्य सरकार क खजाना पर सेहो नीक पडत। ताहि लेल एहि साल निबंधन विभाग क वसूली क लक्ष्य 2628 करोड़ अछि। बेहतर संग्रहण आ संभावना कए देखैत एकर लक्ष्य बढ़ाकए 2900 करोड़ क देल गेल अछि। उत्पाद विभाग सेहो जुलाई मास तक 1029 करोड़ क लक्ष्य क विरुद्ध 864 करोड़ क वसूली क लेलक अछि। इ लक्ष्य क 84 फीसद अछि मुदा पिछला साल एहि अवधि मे वसूली क तुलना मे 40 फीसदी बेसी अछि। पिछला साल क तुलना मे एहि वित्तीय वर्ष मे लक्ष्य कए डेढ़ गुणा क देल गेल छल। परिवहन विभाग द्वारा एहि साल राजस्व वसूली क लक्ष्य 800 करोड़ अछि। जुलाई तक 244.60 करोड़ क लक्ष्य क विरुद्ध 271.56 करोड़ क वसूली केलक अछि जे लक्ष्य क 111 फीसद अछि। पिछला वर्ष क तुलना मे सेहो वसूली बेहतर अछि। परिवहन विभाग क वसूली क लक्ष्य बढ़ा कए 900 करोड़ क देल गेल अछि। इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, Hawai seva, latest bihar news, latest maithili news, latest mithila news, maithili news, maithili newspaper, mithila news, patna, saharsa
