करीब 35 मिनट तक पूर्णिया क आसमान मे उडल विमान, नौटा पत्रकार उडबाक लेलथि आनंद
पूर्णिया। बिहारक धरती पर सबस पहिने कोनो विमान 1933 मे पूर्णिया क लालबाबू मैदान मे उतरल छल। 1933 मे पूर्णिया क लोक आसमान मे उडबाक सपना देखने छल। पूर्णियाक जमीन स उडबाक ओ सपना 79 साल बाद पूरा भ रहल अछि। कोनो तीन दशक पूर्व सेहो एहन प्रयास भेल छल, मुदा ओ असफल रहल। सब किछु ठीक रहल त छह नवंबर स पूर्णिया क लोक अपन धरती स आसमान छूबि सकताह। एकर सबटा तैयारी पूरा भ गेल अछि। एहि विमान सेवा क शुरू भेला स मिथिला क एहि पूर्वी हिस्सा स पटना आ कोलकाता क दूरी सिमट कए रहि जाएत। जतए एखन पूर्णिया स पटना जेबा मे रेल मार्ग या सडक मार्ग स आठ घंटा स बेसी लगैत अछि आ देरी विमान स महज पचास मिनट मे तय भ जाएत। एकर सफल संचालन लेल पूर्णिया मे फ्लाइट सेवा क डेमो उड़ान 25 अक्तूबर कए दिन क 2.05 बजे भेल। विमान 2.10 बजे टेकऑफ केलक आ करीब 35 मिनट क बाद घुरी आयल। दस सीटर स्प्रिट एयरवेज क विमान एहि विमान मे पूर्णिया क नौटा पत्रकार सवार छलाह। चूनापुर वायु सेना स्टेशन (लालबाबू मैदान) स विंग कमांडर विश्वजीत कुमार सिंह आ स्प्रिट एयरवेज क जेनरल मैनेजर आर सक्सेना डेमो फ्लाइट कए सीऑफ आ रिसीव केलथि। एहि विमान क पायलट प्रदीप कुमार छथि।
एहि अवसर पर विंग कमांडर विश्वजीत कुमार सिंह कहला जे छह नवंबर स प्रारंभ भ रहल इ सेवा पहिने सप्ताह मे दू दिन उपलब्ध होएत, मुदा जल्द एकरा सप्ताह मे तीन दिन कैल जाएत। दस सीटर स्प्रिट ऑफ इंडिया विमान कोलकाता, पूर्णिया आ पटना क बीच चलत आ पुन: पटना स पूर्णिया होइत कोलकाता तक जाएत। ओ कहला जे समय पर एखन अंतिम फैसला नहि लेल गेल अछि। एहि मौका पर आयोजित समारोह मे पूर्णिया क प्रमंडलीय आयुक्त ब्रजेश मेहरोत्रा, जिलाधिकारी डॉ एन सरवण कुमार, स्प्रीट एयर क जीएम आर सक्सेना, पायलट कैप्टन पटेल, कैप्टेन शर्मा सहित वायु सेना स्टेशन क कईटा पदाधिकारी मौजूद छलाह।
50 मिनट मे पहुंचब पटना
पूर्णिया स पटना जेबा मे 50 मिनट आ कोलकाता जेबा मे एक घंटा 15 मिनट क समय लागत। पूर्णिया स शुरू भ रहल वायु सेवा लेल टिकट आ सेवा क प्रबंधन डीटीडीएस ट्रेवल एंड टूर प्लानर क रहल अछि। एकर अलावा निजी कमीशन एजेंट द्वारा सेहो टिकट उपलब्ध कराउल जाएत।
किराया
पूर्णिया स पटना क किराया 3,495 आ कोलकाता क 3,995 होएत।
टिकट क सुविधा
टिकट क सुविधा पूर्णिया क अलावा कटिहार, किशनगंज, अररिया आ जोगबनी स सेहो उपलब्ध होएत। दिल्ली, मुंबई, बेंगलुरू, चेत्रई आ हैदराबाद स सेहो लिंक सेवा उपलब्ध होएत। यात्री लेल चूनापुर वायु सेना स्टेशन क गेट क निकट यात्री जांच केंद्र होएत आ ओहि ठाम स रनवे तक कंपनी द्वारा गाड़ी क व्यवस्था रहत।
टिकट लेल पूर्णिया मे संदीप 9304781413, पटना मे प्रवीण 8294594547, कोलकाता मे श्यामल 9831459656, बेंगलुरू मे रूपक 9845325826, पटना मे 0612 2227047 कोलकाता मे 033-32023792 स संपर्क क सकैत छी। विशेष जानकारी लेल कंपनी साइट सेहो अछि जेकर पता अछि- डब्ल्यू डब्ल्यू डब्ल्यू डॉट डीटीडीएसइंडिया डॉट काम।
http://www.esamaad.com/regular/2012/08/10746/
दोसरसमाचार
maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna
बहुत बहुत बधाई, मुदा भाडा कनि बेसी अछि।
Bahut neek samaad. Darbhanga sa seho biman seva suru hebak chahi.
neek muda bhada prohibitive achhi je north east janka subsidized karebak prayas ho.