पटना। उद्घाटन त हीरा उद्योग क इकाई क छल, मुदा महफिल मे छाएल रहल सूइया। खास गप इ जे पीड़ा देबाक अपन प्रकृति क उलट बृहस्पति दिन क सूइया सबकए हसेलक। जखन- जखन एकर नाम आएल, लोक ठहाका लगेलथि। श्रेन्यूज एंड कंपनी लिमिटेड क हीरातराशी इकाई क उद्घाटन पर सूइया क गप शुरू क श्रम संसाधन मंत्री जनार्दन सिंह सिग्रीवाल राजद प्रमुख लालू प्रसाद कए निशाना पर लैत कहलथि जे आब सपना नहि, सामने देखू सूइया क गप करैत छी! एहि ठाम त हीराक कारखाना लागि गेल।
एकर बाद मुख्यमंत्री नीतीश कुमार सेहो चुटकी लेबा स पाछु नहि चुकलथि। राजद क परिवर्तन रैली कए निशाना पर लैत ओ कहलथि जे किछु समर्थक कए जुटा कए के की कहैत अछि से महत्वपूर्ण नहि अछि। दरअसल, भोकनिहार कए सुइये याद रहैत अछि। लोक गप सूईया क करैत छल आओर एहि ठाम हीरा आबि गेल, मुदा सूइया क सेहो कारखाना लगबाक चाही नहि त ओ सब दिन सुईया कारखाना लेल कनैत रहताह।
बिहार इंडस्ट्रीज एसोसिएशन क अध्यक्ष केपीएस केसरी आओर द बिहार चेंबर ऑफ कामर्स क पूर्व अध्यक्ष ओपी साह क नाम लैत ओ कहलथि जे हिनका सब स हम आग्रह सेहो करैत छी जे एकटा सूइया क कारखाना लगा देथि। कतेक पैसा लागत, किया त जखन तक सूइया क कारखाना नहि लागत , लोक बजैत रहत जे बिहार मे सुइयाक कारखाना नहि लागल। एहि स पहिने नीतीश कुमार पाटलिपुत्र इंडस्टियल एरिया मे बिहारक पहिल हीरातराशी कंपनी क उद्घाटन केलथि।
एहि मौका पर मुख्यमंत्री कहलथि जे इ कहब गलत होयत जे प्रदेश मे पूंजी निवेश नहि भ रहल अछि। असलियत इ अछि जे एहि ठाम बिहार क संग-संग बाहरी लोक सेहो निवेश क रहल छथि। मुख्यमंत्री कंपनी क सीएमडी श्रेयस स बिहार क आन क्षेत्र मे सहो निवेश करबा लेल आग्रह केलथि। एहि दौरान कंपनी अपन पहिल हीरा मुख्यमंत्री कए भेंट केलक, जे मुख्यमंत्री पटना संग्रहालय कए दान क देलथि आ कहलथि जे इ एतिहासिक दिन छी आ इ हीरा बिहार मे बदलावक प्रतीक अछि ताहि लेल एकर संग्रहालय मे नीक स प्रदर्शन कैल जाए। मुख्यमंत्री कहला जे के सोचने छल जे एक दिन बिहार मे हीरा क कारखाना लागत। हमरा लग जखन एहि संबंध मे प्रस्ताव आयल त पुलिस महानिदेशक क संग बैसार क तय केलहुं जे पुलिस जखन सुरक्षा क मानक पर तैयार भ जाएत तखन एहि प्रस्ताव पर मंजूरी देब। आइ हमरा इ कहैत खुशी भ रहल अछि जे बिहार पुलिस एहन वातावरण तैयार करबा मे सफल रहल जाहि मे बिहार निवेशक लेल सबस उपयुक्त राज्य भ गेल अछि। एहि अवसर पर कंपनी क सीएमडी श्रेयस कहला जे इ ईकाई हुनकर कंपनीक तेसर आ सबस पैघ ईकाई छी। एहि ठाम गुजरात क ईकाई मे काज केनिहार बिहारी कए नियुक्त कैल गेल अछि। ओ कहला जे एहि ठाम लगभग 600 करोड टकाक निवेश कैल जा रहल अछि आ करीब 1500 लोक कए रोजगार देल जा रहल अछि। ओ कहला जे इ बिहार लेल एकटा शुरुआत अछि जे गुजरात स 1500 बिहारी कारीगर आइ अपन राज्य लौट गेल अछि आ हिनका सब कए अपन राज्य मे ओ काज करबाक मौका भेट रहल अछि जे काज करबा लेल इ सब गुजरात गेल छलाह।
दोसरसमाचार
इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bihar news, darbhanga, latest bihar news, latest maithili news, latest mithila news, maithili news, maithili newspaper, mithila news, patna, saharsa
