दोसरसमाचार
पटना। नालंदा अंतरराष्ट्रीय विश्वविद्यालय क प्रथम कुलाधिपति (चांसलर) नोबेल पुरस्कार विजेता आ अर्थशास्त्री अमर्त्य सेन हेताह। नालंदा अंतरराष्ट्रीय विश्वविद्यालय लेल गठित गवर्निंग बोर्ड क सदस्य आ सिंगापुर क पूर्व विदेश मंत्री जार्ज यियो घोषणा केलथि जे अमर्त्य सेन कए विश्वविद्यालय क प्रथम चांसलर क रूप मे नियुक्त करबा क मंजूरी भेटल गेल अछि। ओ कहला जे भारत क राष्ट्रपति प्रतिभा पाटिल अमर्त्य सेन कए विश्वविद्यालय क कुलाधिपति नियुक्त करबा क मंजूरी द देलथि अछि। एकर संगहि नालंदा अंतरराष्ट्रीय विश्वविद्यालय गवर्निंग बोर्ड क भेल बैसार मे परियोजना रिपोर्ट, कनेक्टिविटी, शिक्षक क भर्ती आदि विषय पर चर्चा भेल। बैसार मे दूटा नव विद्यापीठ क शुरूआत जुलाई, 2013 स करबा पर सहमति सेहो बनल। गवर्निंग बोर्ड क बैसार क बाद अमर्त्य सेन आओर प्रोफेसर सौगत बोस कहला जे विश्वविद्यालय क दूटा नव विद्यापीठ जुलाई 2013 स शुरू भ जाएत। सेन कहला जे पहिल दूटा विद्यापीठ क रूप मे स्कूल आफ हिस्टोरिकल स्टडीज आ स्कूल आफ इकोलाजी एंड इनवायर्नमेंटल स्टडीज मे अध्यापन शुरू भ जाएत। प्रत्येक स्कूल मे स्नातकोत्तर डिग्री कए 100-100 टा छात्र हेताह। बोस कहला जे प्रत्येक विद्यापीठ मे 13-13टा शिक्षक नियुक्त हेताह। सबटा शिक्षक क नियुक्ति आ हुनकर वेतनमान दक्षिण एशियाई विश्वविद्यालय (सार्क यूनिवर्सिटी) क मानदंड क अनुरूप होएत।
दोसर दिस मुख्यमंत्री नीतीश कुमार कहला अछि जे नालंदा अन्तरराष्ट्रीय विश्वविद्यालय मे स्कूल ऑफ इकोनॉमिक्स आ बेसिक साइंस क संकाय खोलल जाए। एक अणे मार्ग स्थित मुख्यमंत्री आवास पर नालंदा अन्तरराष्ट्रीय विश्वविद्यालय नियंत्रण परिषद क सदस्य क संग एकटा शिष्टाचार बैसार क दौरान नीतीश कहला जे स्कूल ऑफ इकोनॉमिक्स आ बेसिक साइंस क संकाय खुलबाक चाही। एहि बैसार मे नालंदा अन्तरराष्ट्रीय विश्वविद्यालय नियंत्रण परिषद क सदस्य प्रोफेसर अमर्त्य सेन, जार्ज यो, प्रोफेसर सुसुमू नाकानिशि, प्रोफेसर वांग वांगवे, लार्ड मेघनाद देसाई, प्रोफेसर सुगाता बोस, प्रोफेसर तानसेन सेन आओर डॉ. गोपा सब्बलरवाल शामिल छलथि।
लगभग एक घंटा तक चलल एहि शिष्टाचार भेंट क दौरान नालंदा अन्तरराष्ट्रीय विश्वविद्यालय क विभिन्न पहलु पर गंभीरता स विचार कैल गेल आ एहि विश्वविद्यालय क भविष्य क स्वरूप पर सेहो गप भेल। मुख्यमंत्री नालंदा अन्तरराष्ट्रीय विश्वविद्यालय क निर्माण कार्य कए शीघ्र प्रारंभ करबाक आवश्यकता पर बल देलथि। एहि बैसार मे शिक्षा मंत्री पीके शाही, सांसद एनके सिंह, मुख्य सचिव नवीन कुमार, विकास आयुक्त एके सिन्हा आ शिक्षा विभाग क प्रधान सचिव अमरजीत सिन्हा सेहो उपस्थित छलाह।
maithili news, mithila news, bihar news, latest bihar news, latest mithila news, latest maithili news, maithili newspaper
