दोसरसमाचार
सीतामढी, मधुबनी, बेगूसराय, वैशाली आ आरा कए भेल चयन
पटना । बिहार मे पांच टा नव मेडिकल कॉलेज खुलत । पांच मे स चारिटा मेडिकल कॉलेज उत्तर बिहार मे, जखनकि एकटा दक्षिण बिहार मे खुलत। सूत्र स भेटल जानकारी क अनुसार सीतामढी, मधुबनी, बेगूसराय, वैशाली आ आरा मे इ मेडिकल कॉलेज खुलत। सरकार संबंधित जिला मुख्यालय मे 20 एकड जमीन तकबा लेल जिलाधिकारी कए कहलक अछि। गौरतलब अछि जे वैशाली क महुआ मे 20 एकड जमीनक चयन क लेल गेल अछि, जखन कि आन ठाम लेल जमीनक चयन करबाक प्रक्रिया शुरु भ गेल अछि। उम्मीद कैल जा रहल अछि जे 2020 तक सबटा मेडिकल कॉलेज जमीन पर उतरि जायत। मंगलदिन स्वास्थ्य विभाग मे एकरा पर एकटा खास बैसार भेल आ निर्णय लेल गेल जे एहि योजना कए समय पर पूरा कैल जाये। फिलहाल पांच टा कॉलेज कए जमीन पर उतारबा लेल 400 करोड टका आवंटित कैल गेल अछि। विभाग क कहब अछि जे अगर जिला मुख्यालय लग अपन 20 एकड जमीन नहि रहत त रैयती जमीन सरकार लीज पर लैत, ताहि लेल एखन इ राशिक आवंटन कैल गेल अछि। उल्लेखनीय अछि जे तिरहुत रियासत क जमाना मे केवल दरभंगा मे मेडिकल कॉलेज व अस्पताल छल, बाद में भागलपुर, मुजफ्फरपुर, आ मधेपुरा मे खुलल। चारिटा आओर नव मेडिकल कॉलेज भेला स एहि क्षेत्र मे इ इलाका काफी समृद्ध भ जाएत।
मुख्यमंत्री नीतीश कुमार अपन सात निश्चय मे पांचटा मेडिकल कॉलेज खोलबाक शपथ लेने छलाह। पिछला छह माह स एकर बाट ताकल जा रहल छल। ओना राष्ट्रीय मानक क अनुसार बिहार मे 21टा आओर मेडिकल कॉलेज क जरुरत अछि, खास क चंपारण आ सारण क क्षेत्र मे एकर जरुरत एखनो अछि। एखन राज्य मे आठटा सरकारी मेडिकल कॉलेज अछि। तीनटा निजी क्षेत्र क मेडिकल कॉलेज अछि, जखन कि एम्स सन दूटा संस्थान अछि। बाकी बिहटा, मधेपुरा मे भवन तैयार भ रहल अछि। पूर्णिया, छपरा आ समस्तीपुर मे सेहो जमीन ताकल जा रहल अछि।
