नई दिल्ली। बिहार क कईटा नेता रेल मंत्री बनलथि। ललित बाबू स ल कए लालू प्रसाद तक एहि मंत्रालय स नाम कमेलथि। संसद मे कई बेर इ आरोप सेहो लरगल जे रेल मंत्रालय कए बिहार पर विशेष मेहरबानी भ रहल अछि। रामविलास पासवान कए बजट भाषणक दौरान ममता बनर्जी सदन मे हंगामा क देलथि जे इ बिहारक रेल बजट छी। किछु एहने आरोप लालू पर सेहो लगैत रहल, मुदा हकीकत इ अछि जे एखनो रेलवे इंफ्रास्ट्रक्चर क विकास क मामला मे आंध्रप्रदेश सन राज्य स बिहार काफी पाछु अछि। अगिला आठ साल मे आंध्र स आगू निकलबा लेल बिहार मे एहि सेक्टर क सालाना 25 फीसदी क ग्रोथ चाही, बशर्ते आंध्र अपन मौजूदा रफ्तार स बढैत जाए। इ तखने मुमकिन अछि जखन बिहार क सबटा राजनीतिक दल राज्य कए ओकर वाजिब हक दियेबा लेल एकजुट भ जाइथि आ रेल क लंबित परियोजना कए समय पर पूरा करेबा लेल व्यक्तिगत प्रयास क संग संग सामूहिक प्रयास सेहो हुए। बिहार मे रेलवे क जेतबा परियोजना लंबित अछि ओतबा परियोजना कोनो आन राज्य मे लंबित नहि अछि। बिहार मे रेल पटरीक विस्तार कोनो आन जनसंख्या घनत्व वाला राज्य क मुकाबले सबस कम भेल अछि। किछु एहने स्थिति दोहरीकरण, विद्युतीकरण आ आमान परिवर्तन क सेहो अछि। छपरा मे रेल कारखाना जरूर लालूक व्यक्तिगत प्रयास स चालू भ गेल, मुदा हरनौत, मढोरा आ मधेपुरा एखनो लंबित अछि। छोट-मोट परियोजनाक त नाम लेनिहार कियो नहि अछि। स्टेशनक आधुनिकीकरण नाम मात्र लेल भ रहल अछि। सबस गौरतलब इ अछि जे बिहार मे लेल गाडी मे जे डिब्बा आवंटित अछि ओहि मे स 80 फसदी एहन अछि जेकर उपयोग आन राज्यक लेल नहि कैल जा सकैत अछि। आन राज्य मे ओकरा क्षतिग्रस्त या पुरान घोषित क देल जाइत अछि। यात्रीक संख्याक मुकाबले बिहार मे गाडीक संख्या सेहो कम अछि। इ अनुपात भारत मे आन कोनो राज्य मे देखबा लेल नहि भेटैत अछि। एहि कारण स बिहार लेल टिकट लेब रेलवे मे सबस कठिन काज भ गेल अछि। गाडीक संख्या कम रहबाक तकनीकी कारण पटरीक विस्तार नहि होएब सेहो कहल जा सकैत अछि। एहन मे सवाल उठैत अछि जे बिहारक रेलमंत्री केवल संसद मे बिहार ल कए बदनाम भेला या बिहार रेल मामला मे एतबा पाछु अछि जे हुनक अथक प्रयासक बावजूद बिहार आंध्रप्रदेश सन राज्य स एखनो एतबा पाछु अछि जे ओकर बराबरी करबा लेल 25 फीसदीक दर स ओकरा अपन विकास करै पडत। सवाल बिहार क अछि जे अपन हक लेबा मे हरदम पाछु रहल अछि।
maithili news, mithila news, bihar news, latest bihar news, latest mithila news, latest maithili news, maithili newspaper
