दोसरसमाचार
अलीनगर (दरभंगा)। दरभंगा जिलाक अलीनगर बिहार क राजनीति मे खास स्थान रखैत अछि। मुदा आई-काल्हि अलीनगर क पहचान एहि कारण स नहि भ रहल अछि जे इ बिहार मे नेता प्रतिपक्ष क विधानसभा क्षेत्र अछि, बल्कि अलीनगर आई अपन किसान क परिश्रम आ समर्पण लेल चर्च मे बनल अछि। अलीनगरक चारिटा गामक किसान एकटा भगिरथ प्रयास मे दिन राति एक केने छथि। अपन सूखल खेत तक पाइन ल जेबा लेल एहि ठामक किसान नदीक धार मोडबा मे लागल छथि। प्रकृतिक प्रकोप आ सरकारी उपेक्षा क कारण एहि क्षेत्र क अधिकतर खेत मे लागल फसल पटवन क अभाव मे झूलसी गेल अछि। किसानक आरोप अछि जे स्थानीय विधायक कहबा लेल बिहार मे नेता प्रतिपक्ष जरूर छथि मुदा किसान क एहि समस्या कए निराकरण करबा लेल कहियो प्रयासरत नहि रहलाह। मिर्जापुर, बघेला मनहर आ ननकार गामक किछु पैघ किसान त पंपिंग सेट स रोपनी क लेलथि मुदा फसल बचेबा लेल हुनको मुश्किल भ रहल अछि। सूखाइत फसल देखबाक बावजूद क्षेत्र मे सरकारी तंत्र क विकलांगता दूर नहि भ पाबि रहल छल। किसानक आंखिक सामने हुनकर मेहनत आ भविष्य झुलसि रहल छल। खेती पर आश्रित किसान क बैचेनी बढैत गेल। किसान कए कोनो उपाय नहि देखा रहल छल। मिर्जापुर बघेरा चौर मे मनहार आ ननकार क किसान क सेहो करीब छह सौ एकड मे लागल फसल सूखा गेल। तखन स्थानीय किसान सब मिल कए अपन स्तर पर निकारण करबाक फैसला लेलथि। चारू गामक किसान बैसार क तय केलथि जे अगर बघेला घाटकलग नदी कए धार गाम दिस मोडि देल जाए त खेत तक पाइन पहुंचाउल जा सकैत अछि। बैसार मे तय भेल जे संपन्न किसान गाडी आ जमीन देताह आ गरीब किसान श्रमदान करताह। बैसारक अगिला दिस स जमीन पर काज शुरू क देल गेल। गाडी स माइट खसायब शुरू भेल। किसान सपरिवार श्रमदान क बांध तैयार करबा मे लागि गेलाह। खेत मे पटवन क व्यवस्था क सपना साकार हेबाक दुहारि पर पहुंच चुकल अछि। जाति आ धर्म क भेद स कोसो दूर इ चारू गामक लोक खेत मे पाइन पहुंचेबा लेल एक भ चुकल छथि। बांधक काज मे लागल कोन किसान कोन जाति आ कोन धर्मक अछि इ कोनो माने नहि रखैत अछि। चंद्रमोहन मिश्र कोदारी स माटी काटी टोकरी भरि रहल छथि आ निसारूल ओ टोकरी कए उठा ल जा रहल छथि। भरोसी यादव क टोकरी मे माइट तिरपित राम द रहल अछि। सरकारी उपेक्षा क दर्द जरूर अछि मुदा अपन मेहनत पर सब किसान कए भरोस अछि। सबहक एक सुर मे कहब अछि जे सरकार, मंत्री, विधायक सब किछु करत इ सोचब छोडि चुकल छी। प्रकृति जखन हमरा सब पर खिसिया गेल अछि त हुनका स कोनो शिकायत किया करि। आब त बस इ बांध क निर्माण कोना आ कहिया पूरा होएत तेकर गप करू। हम सब हर हाल मे एहि बांध कए जल्द स जल्द पूरा करबा मे लागल छी। बांध लगभग पूरा हेबाक क्रम मे अछि। अलीपुर क एहि चारि गामक किसानक जिद आ परिश्रम देखि आसपासक गाम क किसान ऐहो दंग छथि। मुदा आश्चर्य जे श्रमदान करबा लेल सेहो स्थानीय विधायक एखन धरि हाथ नहि बढेलाह अछि। एहन मे नेता या सरकारी तंत्र कए कोसबा स नीक लागल जे दू टोकरी माइट बांध पर फेंक देल जाए।
maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna
