दरभंगा मेडिकल स्‍कूलक जमीन पर बनत अखिल भारतीय आयुर्विज्ञान संस्‍थान

दरभंगा । 1912 मे स्‍थापित दरभंगा मेडिकल स्‍कूलक जमीन पर बिहारक दोसर आ उत्‍तर बिहारक पहिल अखिल भारतीय आयुर्विज्ञान संस्‍थान खुलत। दरभंगा एम्‍स उत्तर बिहार क पहिल स्वायत्त मेडिकल संस्‍थान होएत।

एहि संबंध मे राज्‍य सरकार शीघ्र एकटा प्रस्‍ताव केंद्र कए पठा रहल अछि। जिला प्रशासन क दावा अछि जे एहि प्रस्‍ताव लेल जमीन जरुरी दस्‍तावेज ताकल जा रहल अछि आ 26 नवंबर तक सबटा कागज पटना पठा देल जायत।

उल्‍लेखनीय अछि जे केंद्र 2014 स राज्‍य सरकारक एहि प्रस्‍तावक बाट ताकि रहल अछि। राज्‍य सरकार करीब चारि वर्ष तक मंथन केलाक बाद अखिल भारतीय आयुर्विज्ञान संस्‍थान लेल पटनाक बाद दोसर शहर दरभंगाक चयन कलक अछि। सरकार अखिल भारतीय आयुर्विज्ञान संस्‍थान लेल 1946 में दरभंगा मेडिकल स्‍कूल स अपग्रेड भेल दरभंगा मेडिकल कॉलेजक जमीन देत। एहि तरहे 1912 मे स्‍थापित दरभंगा मेडिकल स्‍कूल दोसर बेर अपग्रेड होएत। 1946 मे इ पहिल बेर अपग्रेड भेल छल।

जिलाधिकारी चंद्रशेखर कुमारक कहब अछि जे मुख्‍यसचिवक निर्देश पर डीएमसीएच लेल आवंटित जमीनक दस्‍तावेज ताकल जा रहल अछि। एखन धरि भेटल दस्‍तावेजक अनुसार 1912 मे स्‍थापित दरभंगा मेडिकल स्‍कूल लेल कुल 282 एकड जमीन आवंटित छल जाहि मे स 250 एकड जमीनक दस्‍तावेज उपलब्‍ध भ गेल अछि। बाकी जमीनक दस्‍तावेज ताकल जा रहल अछि। 26 नवंबर तक जमीन संबंधी सबटा दस्‍तावेज पटना पठा देल जायत।  दोसर दिस डीएमसीएच अधीक्षक डॉ. आरआर प्रसाद कहला जे किछु जमीन अतिक्रमित अछि मुदा ओ पैघ समस्‍या नहि अछि। अस्‍पताल प्रशासन जिला प्रशासनक संग पूरा सहयोग क रहल अछि। डीएमसीएच अधीक्षक डॉ. आरआर प्रसाद सेहो उम्‍मीद जतौलाह जे एहि सप्‍ता‍ह बाद सबका कागजी काज पूरा क लेल जायत।

डीएमसीएच अधीक्षक डॉ. आरआर प्रसाद कहला जे इ राज्य क तेसर आ उत्तर बिहार क पहिल स्वायत्त मेडिकल कॉलेज होएत। पटना मे एम्स आ आईजीआईएमएस स्वायत्त मोड पर चलि रहल अछि। राज्य मे एखन आठ टा सरकारी मेडिकल कॉलेज चलि रहल अछि। एहि मे पीएमसीएच आ एनएमसीएच पटना, डीएमसीएच दरभंगा, एसकेएमसीएच मुजफ्फरपुर, एएनएमएमसीएच गया, जेएलएनएमसीएच भागलपुर, जीएमसीएच बेतिया आ वर्द्धमान आयुर्विज्ञान संस्थान पावापुरी शामिल अछि।

फिलहाल डीएमसीएच मे एमबीबीएस क 100 आ पीजी (डिप्लोमा/डिग्री) क 143 सीट अछि। एतबे नहि डीएमसीएच परिसर मे पारा मेडिकल क पढ़ाई सेहो होइत अछि जाहि मे 163 छात्र-छाक नामांकन होइत अछि। फिलहाल एहि ठाम  ओपीडी मे औसतन 2500 मरीज प्रतिदिन इलाज करबैत अछि। दरभंगा आ कोशी प्रमंडल क संगहि पड़ोसी देश नेपाल स सेहो एहि ठाम मरीज अबैत अछि। 1050 बेड क व्यवस्था अछि। डॉक्टर लेल 206 स्वीकृत पद अछि, जाहि मे  97 कार्यरत छथि। नर्स क स्वीकृत पद 1200 अछि जाहि मे मात्र 297 कार्यरत छथि। कर्मीक स्वीकृत पद 120 अछि मुदा 50 कार्यरत छथि।

डीएमसीएच क कर्मी क भविष्‍यक सवाल पर डीएमसीएच अधीक्षक डॉ. आरआर प्रसाद कहला जे एखन नहि पर कोनो अंतिम निर्णय नहि भेल अछि, मुदा भ सकैत अछि जे दरभंगा मेडिकल कॉलेज अस्पताल (डीएमसीएच) मे कार्यरत 97 डाक्टरों, 347 पारा मेडिकल आ अन्य कर्मी सब कए राज्य क दोसर मेडिकल कॉलेज मे पठा देल जाये, जाहि स ओहि कॉलेज सब मे डॉक्‍टर आ कर्मीक कमी दूर कैल जा सकत। मुदा एखन एहि पर कुछ कहब कठिन अछि। एम्‍स मे समावेश क सवाल पर ओ कहला जे दरभंगा एम्स लेल दिल्ली एम्स क पैटर्न पर डाक्टरों आ अन्य कर्मी क नियुक्ति होएत।