भारत मे कोरोना वायरसक मामिला 50 हज़ार से ऊपर चली गेल अछि, देश भरि मे लोक सभ कोरोना वायरस के मादे प्रतिबंधक पालन करैत घरे मे रहि रहल छथि आ अपन घरे स’ काज क’ रहल छथि। लेकिन लोक सभ के महामारी के बारे मे ख़बरि प्राप्त करब सहो ज़रूरी बुझना जाइत छैन्ह विशेषक’ कोरोना के मादे फूसि ख़बरक जे बाढि आबि गेल अछि, तकरा देखैत।
कोविड-19 के बारे मे फूसि खबर जेना उड़ि रहल अछि ओकरा देखैत विश्व स्वास्थ्य संगठन एहि बारे मे “इन्फ़ोडेमिक” के आशंका ज़ाहिर केलक अछि। एहि कारणें लोक के नहिं बुझा रहल छैन्ह जे ज़रूरी भेला पर सही जानकारी के लेल ओ कत’ जाथि। एहि सब बात के ध्यान मे रखैत विकिपीडिया के स्थानीय स्वयंसेवी लोकनि एहि चुनौती स’ लड़ि रहल छथि आ विकिपीडिया पर कोविड-19 के बारे मे जानकारी मे अंग्रेज़ी और 10 अन्य भारतीय भाषा मे सुधार क’ रहल छथि।
दोसरसमाचार
एहि महामारी के ल’क’ विकिपीडिया के आलेख दुनिया भरि मे लोकप्रिय भ’ रहल अछि। अंग्रेज़ी मे विकिपीडिया पर एहि स’ संबंधित आलेख के जनवरी 2020 के बाद एखन धरि 2 करोड़ लोक पढि चुकल छथि। ई आलेख सभ प्रमाणित संदर्भ आ स्रोत पर आधारित अछि आ बहुत रास आलेख त’ मात्र अही लेल लिखल गेल अछि जाहि स’ कोविड-19 के बारे मे कोनो तरहक अफ़वाह पर विराम लागै।
“हम विकिपीडिया के संपादित करब शुरू केलहुँ तकर कारण ई छल जे हम डॉक्टर और शोधकर्ता छी, ई हमर कर्तव्य अछि जे हम दुनिया के सही सूचना उपलब्ध करबियैक”, ई कहब छैन्ह नेथा हुसैन के जे पिछला 10 साल स’ विकिपीडिया मे योगदान द’ रहल छथि। “भारत मे कोविड-19 के मामिला जेना पसरि रहल अछि, हमर ई निजी मिशन हमरा लेल बहुत महत्वपूर्ण भ’ गेल अछि। यैह कारण छै जे हम भारत मे बहुत लोकक संग मिलि क’ काज क’ रहल छी ताकि हम आम लोक के नवीनतम जानकारी द’ सकी”।
विकीमीडिया के स्वयंसेवी एहि बात के मानैत छथि जे भारतीय भाषा मे ऑनलाइन स्वास्थ्य संबंधी जानकारीक बड्ड अभाव छैक आ तैं ओ लोकनि आम भारतीय के ई जानकारी उपलब्ध करेबा लेल बहुत प्रयास क’ रहल छथि। विश्व स्वास्थ्य संकटक एहि समय मे ई मुद्दा और ज़्यादा आवश्यक भ’ गेल अछि जखन कि लोक सभ के नवीनतम आ संगत जानकारी पहुँचायब ज़रूरी भ’ गेल छैक। स्वयंसेवी लोकनि 10 भारतीय भाषा मे स्वास्थ्यक बारे मे जानकारी जुटेबा मे लागल छथि। अंग्रेज़ी के आलेख मे सहो ओ लोकनि भारत मे कोरोना संक्रमण के मादे सूचना जोरि रहल छथि। एहि स’ संबंधित पृष्ठ के फ़रवरी स’ सभ दिन 2 लाख लोक पढि रहल छथि।
विकिडाटा मे भारत के बारे मे सूचना के बढ़ेबा लेल विकीप्रोजेक्ट इंडिया विभिन्न समूहक संग मिलि क’ काज क’ रहल अछि। विकीडाटा केंद्रीय डाटाबेस छै जकरा पर विकीमीडिया प्राजेक्ट्स के लेल जंतब संग्रह करबाक भार छै। विकीडाटा कोविड-19 टास्क फ़ोर्स हालहिं मे कोविड-19 डैशबोर्ड बनौलक अछि जत’ अहां राष्ट्रीय आ राज्य सभ मे एहि बीमारी के फैलाव के जंतब ल’ सकैत छी।
“विकिपीडिया स’ पाठक लोकनि के कोविड-19 के कतेक केस भेलैक और कतेक आदमी कोन राज्यक कोन ज़िला मे ठीक भेलैक से सभ जानकारी भेट जाइत छैन्ह। एहि के लेल डाटा प्रतिष्ठित संगठन सभ स’ जोगार कयल जाइत अछि। एहि मे शामिल अछि विश्व स्वास्थ्य संगठन, स्वास्थ्य एवं परिवार कल्याण मंत्रालय आ तकरा संग-संग स्थानीय सरकार जे बुलेटिन प्रसारित करैत अछि ओहो सूचना सभ संग्रह कयल जाइत अछि,” ई कहब छैन्ह जिनोय टॉम जेकब के जे विकिपीडिया मे 2017 स’ जुडल छथि। “विकीडाटा अही काजक लेल एतेक महत्वपूर्ण अछि किएक त’ ई डाटा संग्रह करैत अछि आ बुलेटिन सभ स’ प्राप्त आँकड़ा के एना सुव्यवस्थित करैत अछि जे महामारी के बारे मे विकिपीडिया के आलेख के महत्व के ई और बढ़ा दैत अछि”।
भारत मे कोविड-19 के मामिला जेना-जेना आगू जा रहल अछि, विकिपीडिया प्रोजेक्ट आन-आन संस्थाक संग हाथ मिला रहल अछि। एहि दिशा मे संस्कृत स’ लेल गेल शब्द ‘स्वस्थ’ नामक संगठन भारत के राष्ट्रीय स्वास्थ्य प्राधिकरण और स्वास्थ्य मंत्रालय एवं जॉन हॉप्किन्स यूनिवर्सिटी, अमरीका के महामारी विशेषज्ञ और स्विट्जरलैंड मे मौजूद विश्व स्वास्थ्य संगठनक संगे मिलिक’ काज क’ रहल अछि।
स्थानीय पार्ट्नरक अलावा, विकिपीडिया पर कोविड-19 मादे जे सूचना देल गेल अछि ओकरा विकीप्रोजेक्ट मेडिसिनक सहयोग सहो हासिल छैक जाहि मे दुनिया भरिक डॉक्टर और विशेषज्ञ सभ शामिल छथि। विकीप्रोजेक्ट मेडिसिन विभिन्न भाषा मे 35,000 मेडिकल आलेख जुटौलक अछि आ 150 टा संपादक एहि पर नजरि रखने छथि।
दुनिया मे जखन 2014 मे ईबोला वायरस के चिंता मे लोक डूबल छल, विकिप्रोजेक्ट मेडिसिन मे काज कर’ बला स्वयंसेवी सभ मिलिक’ अलग-अलग 50 भाषा मे ईबोला पर आलेख लिखलनि जाहि स’ प्रभावित देशक लोक के एहि बारे मे विश्वसनीय जानकारी ल’ सकथि।एहि प्रयासक सार्थकता पता तखन भेल जखन द न्यू यॉर्क टाइम्ज़ मे विकिपीडिया के ईबोला के बारे मे सूचनाक लेल सबस’ बेसी विश्वसनीय इंटर्नेट स्रोत मानल गेल।
आइ विकीमीडिया फ़ाउंडेशन के चीफ़ प्रोडक्ट ऑफ़िसर टोबी नेग्रिन हमरा सबके कहलनि जे स्वयंसेवी समूहक प्रयास स’ भारत मे भिन्न-भिन्न भाषा-भाषी लोक के कोरोना वायरस के बारे मे तत्काल अपनहि भाषा मे सूचना भेटि सकतैन। ओ ईहो कहलनि जे स्वयंसेवी विकीमीडिया के दीर्घ कालक लक्ष्य के लेल बहुत महत्वपूर्ण छथि।
नेग्रिन के कहब छन्हि, “ 2030तक विश्व भरि मे नई दिल्ली स बर्लिन आ सैन फ़्रैन्सिस्को धरि हम मुक्त ज्ञानक सबस’ बड़का सहयोग व्यवस्था बन’ चाहैत छी। एहि लेल हम विश्व भरि मे अपन समर्पित स्वयंसेवी सभक समर्पण पर निर्भर छी। हमर टीम टूल आ संसाधन बनेबा पर ध्यान लगबैत छथि जाहि स’ हमर स्वयंसेवी संपादक लोकनि के अपना ज्ञानक योगदान करबा मे सुविधा होइत छन्हि आ दुनिया मे कोनो भागक लोक आसानी स’ गुणवत्तापूर्ण सूचना प्राप्त क’ सकैत छथि,” नेग्रिन कहैत छथि।
विकिपीडिया आ ओकर सहयोगी प्रोजेक्ट ‘ओपन एडिटिंग’के मॉडल पर चलैत अछि जाहि स’ कोनो तरहक भेदभाव नहिं उत्पन्न हो। एहि मॉडल के कारण कोनो पृष्ठभूमि और कोनो राजनीतिक मानयता के मानय बला लोक आलेख के संपादित क’ सकैत छथि। एहि वजह स’ दुनियाक अलग-अलग हिस्साक, अलग-अलग संस्कृतिक लोक सभ विषय – कला, संस्कृति स’ ल’ क’ कोरोना वायरस सन गंभीर विषय पर तटस्थ सूचनाक निर्माण करैत छथि।
इसमाद लेल उपेन्द्र सिंहक रिपोर्ट
